തിരുവനന്തപുരം: സംസ്ഥാനത്തെ 719 പഞ്ചായത്തുകളിലായി 16.47 ലക്ഷം കുടിവെള്ള കണക്ഷനുകള്‍ നല്‍കാനായുള്ള 4343.42 കോടിയുടെ പദ്ധതികള്‍ അംഗീകാരത്തിനായി സംസ്ഥാന ജല ശുചിത്വ മിഷന് സമര്‍പ്പിച്ചു.

ഇന്നലെ ചേര്‍ന്ന സംസ്ഥാന ജല ശുചിത്വ മിഷന്റെ പ്രഥമ യോഗത്തില്‍ പഞ്ചായത്ത് തലത്തില്‍ വാട്ടര്‍ ആന്‍ഡ് സാനിറ്റേഷന്‍ കമ്മിറ്റികളും രൂപീകരിച്ചു. ഓരോ പഞ്ചായത്തിലെയും പ്രവര്‍ത്തനങ്ങള്‍ ഏകോപിപ്പിക്കുന്നതിനായി ഓഫിസ് ഇന്‍ ചാര്‍ജുമാരെ നിയോഗിച്ചു. ജലജീവന്‍ പദ്ധതി വഴി നടപ്പുസാമ്പത്തികവര്‍ഷം 21.42 ലക്ഷം വീടുകള്‍ക്ക് കുടിവെള്ള കണക്ഷന്‍ നല്‍കും. 

ഈ പദ്ധതി നടത്തിപ്പ് പുരോഗതി സംബന്ധിച്ച്, കേന്ദ്ര ജലശക്തി മന്ത്രി ഗജേന്ദ്ര സിങ് ഷെഖാവത്തും മുഖ്യമന്ത്രി പിണറായി വിജയനും ജൂലൈ 30ന് ജല വിഭവ മന്ത്രി കെ.കൃഷ്ണന്‍കുട്ടിയുടെ സാന്നിധ്യത്തില്‍ വിഡിയോ കോണ്‍ഫറന്‍സിങ് വഴി ചര്‍ച്ച നടത്തിയിരുന്നു. പദ്ധതി നടത്തിപ്പിനായി കേരളം സ്വീകരിച്ച മൈക്രോ ലെവല്‍ പ്ലാനിങ് രീതിയെ കേന്ദ്ര സംഘം അഭിനന്ദിക്കുകയും ചെയ്തു.