തിരുവനന്തപുരം: സംസ്ഥാനത്ത് കൊവിഡ് വ്യാപനം തുടരുന്ന പാശ്ചാത്തലത്തില്‍ ഡേ കെയര്‍ സെന്ററുകള്‍, വിവിധ ഹോമുകള്‍, വയോജന മന്ദിരങ്ങള്‍ എന്നിവയുടെ സംരക്ഷണത്തിന്റെ ഭാഗമായി പരിശീലന പരിപാടി സംഘടിപ്പിച്ചു. സാമൂഹ്യനീതി വകുപ്പിനു കീഴില്‍ പ്രവര്‍ത്തിക്കുന്ന വിവിധ സ്ഥാപനങ്ങള്‍ക്കാണ് ആദ്യഘട്ടമായി ഓണ്‍ലൈന്‍ വഴി പരിശീലനം നല്‍കിയത്.

മൂന്നു സെഷനുകളായാണ് ആദ്യഘട്ട പരിശീലന പരിപാടി സംഘടിപ്പിച്ചത്. ഓരോ സ്ഥാപനങ്ങളും സ്വീകരിക്കേണ്ട പൊതുവായ നടപടികള്‍ എന്തൊക്കെയാണെന്നും ജീവനക്കാരും സ്ഥാപനങ്ങളില്‍ കഴിയുന്നവരും പാലിക്കേണ്ട നിര്‍ദേശങ്ങള്‍ എന്തൊക്കെയാണെന്നും ക്ലാസുകളിലൂടെ ചര്‍ച്ച ചെയ്തു.

400ഓളം സ്ഥാപനങ്ങളുടെ പ്രതിനിധികളാണ് പരിശീലന പരിപാടിയില്‍ പങ്കെടുത്തത്. വിദഗ്ധര്‍ ക്ലാസുകള്‍ക്കു നേതൃത്വം നല്‍കി. ജീവനക്കാരുടെ സംശയങ്ങള്‍ക്ക് ആരോഗ്യ വകുപ്പിലെ വിദഗ്ധ ഡോക്ടര്‍മാര്‍ മറുപടി നല്‍കി.