'

പട്ടിക്കാട്: മതവിദ്യയുള്ളവര്‍ക്ക് തീവ്രവാദികളാകാന്‍ കഴിയില്ലെന്ന് സമസ്ത ജനറല്‍ സെക്രട്ടറി പ്രൊഫ.കെ.ആലിക്കുട്ടി മുസ്‌ലിയാര്‍. പട്ടിക്കാട് ജാമിഅ നൂരിയ്യ അറബിയ്യ കോളജില്‍ പുതിയ അധ്യായന വര്‍ഷ ക്ലാസുകള്‍ ഉദ്ഘാടനം ചെയ്ത സംസാരിക്കുകയായിരുന്നു അദ്ദേഹം.
പരിശുദ്ധ ഇസ്‌ലാം പഠിപ്പിക്കുന്നത് സ്‌നേഹമാണെന്നും മതസഹിഷ്ണുതയും, സൗഹാര്‍ദവും പഠിപ്പിക്കുന്ന മതത്തെ തീവ്രവാദമാക്കി ചിത്രീകരിക്കുന്നത് അപലപനീയമാണെന്നും അദ്ദേഹം കൂട്ടിചേര്‍ത്തു.
സമസ്ത പ്രസിഡന്റായി തെരഞ്ഞെടുക്കപ്പെട്ട എ.പി മുഹമ്മദ് മുസ്‌ലിയാര്‍ക്ക് വിദ്യാര്‍ഥി സംഘടന നൂറുല്‍ ഉലമ നല്‍കുന്ന ഉപഹാരവും അദ്ദേഹം കൈമാറി. സമസ്ത മുശാവറ അംഗങ്ങളായ പി.കുഞ്ഞാണി മുസ്‌ലിയാര്‍, കോട്ടുമല മൊയ്തീന്‍ കുട്ടി മുസ്‌ലിയാര്‍, ഹംസ ഫൈസി ഹൈതമി, സുലൈമാന്‍ ഫൈസി ചുങ്കത്തറ, ശിഹാബുദ്ദീന്‍ ഫൈസി കൂമണ്ണ, ളിയാഉദ്ദീന്‍ ഫൈസി മേല്‍മുറി സംബന്ധിച്ചു. കുമരംപുത്തൂര്‍ എ.പി മുഹമ്മദ് മുസ്‌ലിയാര്‍ അധ്യക്ഷനായി. ഹാജി കെ.കെ.മമ്മദ് ഫൈസി സ്വാഗതവും നജീബുല്ല പള്ളിപ്പുറം നന്ദിയും പറഞ്ഞു.