കോട്ടിയം: തൃക്കോവില്‍വട്ടം പഞ്ചായത്തില്‍പ്പെട്ടതാഴാം പണ, ചെറിയേല ഏലായില്‍ വന്‍ തീപിടുത്തം. അഞ്ച് യൂനിറ്റ് ഫയര്‍ഫോഴ്‌സ് മണിക്കൂറുകളോളം നടത്തിയ പരിശ്രമത്തിനൊടുവിലാണ് തീ നിയന്ത്രണ വിധേയമാക്കാനായത്. 25 ഏക്കറോളം വരുന്ന ഏലായിലെ പുല്ലുകള്‍ക്ക് തീപിടിക്കുകയായിരുന്നു. ഇന്നലെ ഉച്ചക്ക് 12 മണിയോടെയാണ് ഏലായിലെ കോട്ടേ കുന്ന്, താഴാം പണ ഭാഗങ്ങളില്‍ തീ ആളിപടരുന്നത് പ്രദേശവാസികളുടെ ശ്രദ്ധയില്‍പ്പെട്ടത്.
നാട്ടുകാര്‍ ഉടന്‍ തന്നെ തൃക്കോവില്‍വട്ടം ഗ്രാമ പഞ്ചായത്ത് വൈസ് പ്രസിഡന്റ് ജലജകുമാരിയെയും പഞ്ചായത്ത് അംഗം സുരേഷ് ബാബുവിനെയും വിവരം അറിയിച്ചതിനെ തുടര്‍ന്ന് ഇവര്‍ ഫയര്‍ഫോഴ്‌സിനെ വിവരം അറിയിക്കുകയും കുണ്ടറ, കൊല്ലം എന്നിവിടങ്ങളില്‍ നിന്നായി ഫയര്‍ഫോഴ്‌സ് സംഘമെത്തി തീ നിയന്ത്രണ വിധേയമാക്കുകയും ചെയ്തു.
ഏലായില്‍ പയര്‍ കൃഷി നടത്തുന്ന സ്ഥലത്തേക്ക് തീ പടരാതിരുന്നതിനാല്‍ പയര്‍ കൃഷിയ്ക്ക് നാശനഷ്ടമുണ്ടായില്ല. വൈകിട്ടും ഏലായില്‍ നിന്നും പുക ഉയര്‍ന്നു കൊണ്ടിരിക്കുകയാണ്.