ചവറ: തേവലക്കരയില്‍ പൊലിസുകാരനെയും കുടുംബത്തെയും വീടുകയറി അക്രമിച്ച കേസില്‍ മുഖ്യപ്രതി പിടിയിലായി. തേവലക്കര പുത്തന്‍സങ്കേതം മഡോണ ഡെയിലില്‍ മിഥുന്‍ മനോഹര(20)നെയാണ് പൊലിസ് അറസ്റ്റ് ചെയ്തത്.
സംഭവവുമായി ബന്ധപ്പെട്ട് മൂന്നുപേരെ നേരുത്തെ അറസ്റ്റ് ചെയ്തിരുന്നു. അനന്തു, വിഷ്ണു ലാല്‍, അനന്ദു പ്രസാദ് എന്നിവരെയാണ് നേരുത്തെ അറസ്റ്റ് ചെയ്തത്. ഒരാള്‍ കൂടി പിടിയിലാകാനുണ്ട്.
ഇയാള്‍ക്കായി അന്വേഷണം ഊര്‍ജിതമാക്കിയതായി പൊലിസ് പറയുന്നു. പുത്തന്‍സങ്കേതം കോയിപ്പിനേത്ത് വീട്ടില്‍ ഹസന്‍ കുഞ്ഞിനും കുടുംബത്തിനും നേരെയാണ് അക്രമം ഉണ്ടായത്. അഞ്ചംഗ സംഘമായിരുന്നു അക്രമണം നടത്തിയത്. കൊല്ലം വെസ്റ്റ് പൊലിസ് സ്റ്റേഷനിലെ സീനിയര്‍ സിവില്‍ പൊലിസ് ഓഫിസറാണ് ഹസന്‍കുഞ്ഞ്.
ഒളിവിലായിരുന്ന മിഥുന്‍ മനോഹരനെ കോട്ടയം കാഞ്ഞിരപ്പള്ളിയില്‍ നിന്നും ചവറ തെക്കുംഭാഗം സ്റ്റേഷനിലെ സബ് ഇന്‍സ്‌പെക്ടര്‍ ആര്‍ രാജീവ്, ഗ്രേഡ് എസ്.ഐ ലത്തീഫ്, എ.എസ്.ഐ രാംദാസ്, സീനിയര്‍ സിവില്‍ പൊലിസ് ഓഫിസര്‍ സന്തോഷ് എന്നിവരടങ്ങിയ സംഘമാണ് അറസറ്റു ചെയ്തത്. പ്രതിയെ കോടതിയില്‍ റിമാന്റ് ചെയ്തു.