കൊല്ലം: ലൈംഗിക ചൂഷണങ്ങള്‍ക്കെതിരെ കുട്ടികളെ ബോധവത്കരിക്കുന്നതിനായി ഡല്‍ഹിയിലെ ജാമിയ മിലിയ സെന്‍ട്രല്‍ യൂനിവേഴ്‌സിറ്റി വിദ്യാര്‍ഥി അല്‍ അമീന്‍ നടത്തുന്ന സൈക്കിള്‍ പര്യടനം ഇന്ന് കൊല്ലം ജില്ലയിലെത്തും.
രാവിലെ 11ന് കരുനാഗപ്പള്ളി മോഡല്‍ എച്ച്.എസ്.എസില്‍ ജില്ലാശിശു സംരക്ഷണ യൂനിറ്റിലെ ഉദ്യോഗസ്ഥരും സ്‌കൂള്‍ അധികൃതരും ചേര്‍ന്ന് അമീനിനെ സ്വീകരിക്കും. ജൂണ്‍ മൂന്നിന് ജമ്മു കാശ്മീരില്‍ ആരംഭിച്ച പര്യടനം 12 സംസ്ഥാനങ്ങള്‍ പിന്നിട്ടു. 21ന് കന്യാകുമാരിയിലാണ് സമാപനം. സംസ്ഥാനത്ത് എട്ടു ജില്ലകളിലെ തെരഞ്ഞെടുത്ത സ്‌കൂളുകളിലും കോളേജുകളിലുമാണ് സന്ദര്‍ശനം നടത്തുന്നത്. ലൈംഗീക ചൂഷണങ്ങള്‍ക്കെതിരെ ക്രിയാത്മകമായി പ്രതികരിക്കാന്‍ കുട്ടികളെ പ്രാപ്തരാക്കുകയാണ് യാത്രയുടെ ലക്ഷ്യമെന്ന് അമീന്‍ പറയുന്നു. ഇന്ന് ഉച്ചകഴിഞ്ഞ് രണ്ടിന് കുലശേഖരപുരം ഗവണ്‍മെന്റ് മോഡല്‍ സ്‌കൂളിലും 19ന് രാവിലെ 11ന് കൊല്ലം എസ്.എന്‍ കോളേജിലും ഉച്ചകഴിഞ്ഞ് രണ്ടിന് എസ്.എന്‍. ട്രസ്റ്റ് സ്‌കൂളിലും 20ന് കുരീപ്പുഴ ആഗ്‌നസ് മരിയ ഇംഗ്ലീഷ് മീഡിയം സ്‌കൂളിലും ഉച്ചകഴിഞ്ഞ് രണ്ടിന് അഞ്ചാലുംമൂട് ഗവണ്‍മെന്റ് ഹയര്‍ സെക്കന്‍ഡറി സ്‌കൂളിലും സന്ദര്‍ശനം നടത്തും.