പാറ്റ്‌ന: നടുറോഡില്‍നിന്ന പശുവിനെ വിരട്ടിയതിനു ഉടമ പിക്ക് അപ്പ് വാന്‍ ഡ്രൈവറുടെ ഇടതു കണ്ണ് അടിച്ചു പൊട്ടിച്ചു. കാഴ്ച ശക്തി നഷ്ടപ്പെട്ട് ഗുരുതരമായി പരുക്കേറ്റ ഗണേഷ് മണ്ഡല്‍ എന്ന യുവാവിനെ ആശുപത്രിയില്‍ പ്രവേശിപ്പിച്ചു.

കഴിഞ്ഞ വ്യാഴാഴ്ചയായിരുന്നു സംഭവം. സംഭവത്തെ കുറിച്ച് പൊലിസ് പറയുന്നത് ഇങ്ങനെ: ജോലികഴിഞ്ഞു ബൊചാഹി ഗ്രാമത്തിലുള്ള തന്റെ വീട്ടിലേക്കു മടങ്ങിപ്പോകുകയായിരുന്നു ഗണേഷ്. പോകുന്ന വഴി ദേശീയ പാതയില്‍ തടസം സൃഷ്ടിച്ച് പശു റോഡിന്റെ മധ്യത്തില്‍ നില്‍ക്കുകയായിരുന്നു.

പശുവിനെ മാറ്റുന്നതിനായി ഗണേഷ് ഹോണ്‍ മുഴക്കി. ഹോണ്‍കേട്ട പശു വിരണ്ടോടി. ഇതില്‍ ദേഷ്യപ്പെട്ട പശുവിന്റെ ഉടമസ്ഥന്‍ വാനില്‍നിന്നു ഗണേഷിനെ വലിച്ചിറക്കി മര്‍ദ്ദിക്കുകയായിരുന്നു.

വടികൊണ്ട് ഇടതുകണ്ണിന് അടിയേറ്റ ഗണേഷ് ബോധരഹിതനായി. അവിടെ കൂടിയ നാട്ടുകാര്‍ ഉടന്‍ തന്നെ തൊട്ടടുത്ത പ്രഥമിക ആരോഗ്യ കേന്ദ്രത്തില്‍ പ്രവേശിപ്പിച്ചു. പിന്നീട് മെഡിക്കല്‍ കോളജിലേക്ക് മാറ്റി.

പശുവിന്റെ ഉടമ രാം ദുലാര്‍ യാദവിനെതിരെ പൊലിസ് എഫ്‌ഐആര്‍ ഫയല്‍ ചെയ്തിട്ടുണ്ട്.