പുനലൂര്‍: അച്ചന്‍കോവില്‍-കഴുതുരുട്ടി  റോഡിന്റെ ഉദ്ഘാടനം ഇന്ന് വനംമന്ത്രി കെ രാജു നിര്‍വഹിക്കും. അച്ചന്‍കോവില്‍ ധര്‍മ്മശാസ്താ ക്ഷേത്ര ഓഡിറ്റോറിയത്തില്‍ നടക്കുന്ന പരിപാടിയില്‍ വനം സംരക്ഷണ സമിതികളിലെ 30 കുടുംബങ്ങള്‍ക്കുള്ള കുക്കിംഗ് ഗ്യാസ് കണക്ഷന്‍ വിതരണവും മന്ത്രി നിര്‍വഹിക്കും. ആര്യങ്കാവ് ഗ്രാമപഞ്ചായത്ത് പ്രസിഡന്റ് സി സുരേഷ്ബാബു അധ്യക്ഷത വഹിക്കും. എന്‍.കെ പ്രേമചന്ദ്രന്‍ എം.പി മുഖ്യപ്രഭാഷണവും അച്ചന്‍കോവില്‍ ഗവണ്‍മെന്റ് വൊക്കേഷണല്‍ ഹയര്‍ സെക്കന്‍ഡറി സ്‌കൂളിലേക്കുള്ള കമ്പ്യൂട്ടര്‍ വിതരണവും നടത്തും.
അച്ചന്‍കോവില്‍ ട്രൈബല്‍ ഹോസ്റ്റലിലേക്കുള്ള ഫര്‍ണിച്ചറുകളുടെ വിതരണവും ആശംസാ പ്രസംഗവും ജില്ലാ പഞ്ചായത്ത് പ്രസിഡന്റ് കെ ജഗദമ്മ നിര്‍വഹിക്കും. എല്‍.പി സ്‌കൂളിലെ കുട്ടികള്‍ക്കുള്ള ഡിക്ഷ്‌നറികള്‍ അഞ്ചല്‍ ബ്ലോക്ക് പഞ്ചായത്ത് പ്രസിഡന്റ് രഞ്ചു സുരേഷ് വിതരണം ചെയ്യും. ജില്ലാ പഞ്ചായത്തംഗം കെ.ആര്‍ ഷീജ, അഞ്ചല്‍ ബ്ലോക്ക് പഞ്ചായത്തംഗം പി സുനിത, ആര്യങ്കാവ് ഗ്രാമപഞ്ചായത്തംഗം ഗീതാ സുകുനാഥ്, വിവിധ രാഷ്ട്രീയ സംഘടനാ പ്രതിനിധികള്‍ തുടങ്ങിയവര്‍ പങ്കെടുക്കും.