ചെറുവത്തൂര്‍: പൊതുവിദ്യാഭ്യാസ വകുപ്പ് നടത്തിയ യു.എസ്.എസ് പരീക്ഷാഫലത്തില്‍ സംസ്ഥാനത്ത് ഒന്നാം സ്ഥാനം കരസ്ഥമാക്കി ചെറുവത്തൂര്‍ ഉപജില്ല. പരീക്ഷയ്ക്കിരുന്ന 533 വിദ്യാര്‍ഥികളില്‍ 225 പേരെയും സ്‌കോളര്‍ഷിപ്പിനര്‍ഹരാക്കിയാണ് നേട്ടം. 42.21 ആണ് വിജയശതമാനം. കണ്ണൂര്‍ ജില്ലയിലെ പയ്യന്നൂര്‍, തളിപ്പറമ്പ് സൗത്ത് ഉപജില്ലകള്‍ക്കാണ് രണ്ടും മൂന്നും സ്ഥാനങ്ങള്‍ . പയ്യന്നൂരില്‍ പരീക്ഷയെഴുതിയ 715 കുട്ടികളില്‍ 251 പേര്‍ വിജയികളായി (35.1 ശതമാനം). തളിപ്പറമ്പ് സൗത്തില്‍ 268 വിദ്യാര്‍ഥികളില്‍ 81 പേരാണ് വിജയിച്ചത് (30.22 ശതമാനം). സംസ്ഥാനത്തെ 163 ഉപജില്ലകളില്‍ നിന്നാണ് ചെറുവത്തൂരിന്റെ നേട്ടം.
കാഞ്ഞങ്ങാട് വിദ്യാഭ്യാസ ജില്ലയിലെ ഗിഫ്റ്റഡ് ചില്‍ഡ്രണ്‍ അംഗീകാരം ലഭിച്ച 20 കുട്ടികളില്‍ 14 കുട്ടികളും ചെറുവത്തൂര്‍ ഉപജില്ലയില്‍ നിന്നാണ്. അക്കാദമിക മികവ് ലക്ഷ്യം വച്ച് ചെറുവത്തൂര്‍ എ.ഇ.ഒ എം.കെ വിജയകുമാര്‍, ചെറുവത്തൂര്‍ ബി.പി.ഒ പി.വി ഉണ്ണിരാജന്‍ എന്നിവരുടെ നേതൃത്വത്തില്‍ നടന്ന സമയബന്ധിതവും ശ്രദ്ധേയവുമായ നിരവധി പരിശ്രമങ്ങളാണ് ഉപജില്ലയെ ഒന്നാമതെത്തിച്ചത്.