തിരുവനന്തപുരം: രാഷ്ട്രീയ താല്‍പര്യമില്ലെന്ന് പരസ്യമായി ആവര്‍ത്തിക്കുമ്പോഴും തെരഞ്ഞെടുപ്പില്‍ ബി.ജെ.പിക്ക് പരോക്ഷ പിന്തുണയുമായി ശബരിമല കര്‍മസമിതി. ശബരിമലയിലെ യുവതീ പ്രവേശന വിഷയം തെരഞ്ഞെടുപ്പ് കാലത്ത് പ്രത്യേക ലക്ഷ്യത്തോടെ പ്രചരിപ്പിക്കുന്ന കാര്യത്തില്‍ നിന്നും ഒട്ടും പിന്നോട്ടില്ലെന്ന നിലപാടാണ് കര്‍മ സമിതി സ്വീകരിച്ചിരിക്കുന്നത്.

കഴിഞ്ഞ ദിവസം തലസ്ഥാനത്ത് പ്രധാന കേന്ദ്രങ്ങളില്‍ ശബരിമലയിലുണ്ടായ അക്രമ സംഭവങ്ങളുടെ ചിത്രങ്ങള്‍ സഹിതം കൂറ്റന്‍ ഹോര്‍ഡിങ്‌സുകള്‍ കര്‍മ സമിതിയുടെ നേതൃത്വത്തില്‍ സ്ഥാപിച്ചിരുന്നു. ഇത് ചട്ടലംഘനമാണെന്ന പരാതിയുടെ അടിസ്ഥാനത്തില്‍ ജില്ലാ കലക്ടര്‍ ഇടപെട്ട് അവ നീക്കം ചെയ്യുകയും ചെയ്തു. എന്നാല്‍ കലക്ടറുടെ നടപടിക്കെതിരേ കേന്ദ്ര തെരഞ്ഞെടുപ്പ് കമ്മിഷനെ സമീപിക്കുമെന്നാണ് ശബരിമല കര്‍മസിമിതി വര്‍ക്കിങ് ചെയര്‍പേഴ്‌സണ്‍ കെ.പി ശശികല അറിയിച്ചിരിക്കുന്നത്.
രാഷ്ട്രീയം പറയാതെയും ചിഹ്നങ്ങള്‍ പ്രദര്‍ശിപ്പിക്കാതെയുമാണ് കൂറ്റന്‍ ഹോര്‍ഡിങ്‌സുകള്‍ സ്ഥാപിച്ചതെന്നാണ് അവരുടെ വാദം. ഇക്കാര്യം മുഖ്യ തെരഞ്ഞെടുപ്പ് ഓഫിസറെ ബോധ്യപ്പെടുത്തിയിരുന്നതായും അവര്‍ പറയുന്നു. 'മണ്ഡലം മറന്നാലും മണ്ഡലകാലം മറക്കരുത് ', 'കറുപ്പുടുത്തവരെ കരയിച്ചതും കരളു തകര്‍ത്തതും കാണാതെ പോകരുത് ' തുടങ്ങിയ വാക്യങ്ങളോടെ ശബരിമല സമരവുമായി ബന്ധപ്പെട്ട അക്രമ സംഭവങ്ങളുടെ ചിത്രങ്ങളും ഉള്‍പ്പെടുത്തിയാണ് ഹോര്‍ഡിങ്‌സുകള്‍ സ്ഥാപിച്ചത്. പ്രത്യക്ഷത്തില്‍ രാഷ്ട്രീയ പാര്‍ട്ടികളുടെ ചിഹ്നമോ, പേരോ ഉപയോഗിക്കുന്നില്ലെങ്കിലും പരോക്ഷമായി ബി.ജെ.പിക്കും എന്‍.ഡി.എ സ്ഥാനാര്‍ഥികള്‍ക്കും വോട്ട് നേടാന്‍ നിലമൊരുക്കുകയാണ് ഇതിലൂടെ ചെയ്യുന്നതെന്ന് വ്യക്തമാണ്. ഇതു സംബന്ധിച്ച് ഇടതുമുന്നണി തെരഞ്ഞെടുപ്പ് ഉദ്യോഗസ്ഥര്‍ക്ക് പരാതി നല്‍കിയിരുന്നു.