പാലക്കാട്ഃ രൂക്ഷമാകുന്ന വേനലിലും,കൊടുംവരള്‍ച്ചയിലും അധികാരികളുടെ കണ്ണെത്താതെ പല്ലാര്‍മംഗലം ലിഫ്റ്റ് ഇറിഗേഷന്‍ ജീര്‍ണ്ണിച്ച അവസ്ഥയില്‍.എതാനും വര്‍ഷമായി ഇത് ഉപയോഗശൂന്യമായിട്ട്. ഇതിനെ ആശ്രയിച്ചാണ് പ്രദേശത്ത് 500 ഏക്കര്‍ നെല്‍ക്കൃഷിയിറക്കുന്നത്. എന്നാല്‍ ലിഫ്റ്റ് ഇറിഗേഷന്‍ കേടായതിനാല്‍ കൃഷിയിറക്കാന്‍ കഴിയാതെ പാടങ്ങള്‍ നശിച്ചുകൊണ്ടിരിക്കുന്നു. ഇതോടെ നെല്‍ക്കൃഷിയെ മാത്രം ആശ്രയിച്ചു കഴിയുന്ന കര്‍ഷകര്‍ ബുദ്ധിമുട്ടിയിരിക്കുകയാണ്.അതുകൊണ്ടുതന്നെ ഇവിടത്തെ നെല്‍പാടങ്ങളില്‍ മറ്റു വിളകളാണ് കൃഷി ചെയ്യുന്നത്.കൂടാതെ ഈ പ്രദേശത്ത് കുടിവെള്ള ക്ഷാമവും രൂക്ഷമായിരിക്കുകയാണ്.എന്നിട്ടും അധികാരികള്‍ ഇതു പരിഹരിക്കാന്‍ ആവശ്യമായ നടപടികള്‍ സ്വീകരിക്കുന്നില്ല.
2007-08 ല്‍ അന്നത്തെ  മുഖ്യമന്ത്രി ഉമ്മന്‍ചാണ്ടിയുടെ ദുരിതാശ്വാസ ഫണ്ടില്‍ നിന്നും ഒരു ലക്ഷം രൂപ ഇതു പുതുക്കി പണിയാനായി ലഭിച്ചിരുന്നു.അതുകൊണ്ട് കുറച്ച് പണി നടത്തി ഒരു വിള കൃഷി ചെയ്യാനായി.കൂടാതെ 2012-13 ല്‍ ലെക്കിടി-പേരൂര്‍ ഗ്രാമപഞ്ചായത്തിന്റെ  നിര്‍പ പദ്ധതിയില്‍ നിന്നും ഇറിഗേഷന്‍ പുതുക്കിപണിയാന്‍ ഫണ്ടു ലഭിച്ചിരുന്നു.എന്നാല്‍ പണി പൂര്‍ത്തികരിക്കാന്‍ കഴിഞ്ഞില്ല. പുതുക്കി പണിയാനായി ഇറക്കിയ 25 എച്ച്.പിയുടെ രണ്ടു മോട്ടോറുകളും,പമ്പകളും ഇപ്പോള്‍ തുരുമ്പെടുത്തു നശിച്ചുകൊണ്ടിരിക്കുകയാണ്.ലിഫ്റ്റ് ഇറിഗേഷന്‍ നന്നാക്കിയാലും അതുമായി ബന്ധപ്പെട്ട കനാലുകള്‍ പ്രവര്‍ത്തനയോഗ്യമാകാതെ ജലസേചനം നടത്താന്‍ കഴിയില്ല.കിഴക്കോട്ട് 1300 മീറ്ററും,പടിഞ്ഞാറോട്ട് 1800 മീറ്ററും വ്യാപിച്ചുകിടക്കുന്ന കനാല്‍ വര്‍ഷങ്ങളായി പൊട്ടിപൊളിഞ്ഞാണ് കിടക്കുന്നത്. ഇറിഗേഷനോടനുബന്ധിച്ച് ഒരു മിനി തടയണ നിര്‍മ്മിക്കുകയാണെങ്കില്‍ ഈ പ്രദേശത്തെയും,അടിയംപാടം,കാനിയംപാടം എന്നിവിടങ്ങളിലെയും നെല്‍ക്കൃഷി മെച്ചപ്പെടുത്താനും,കുടിവെള്ള ക്ഷാമം പരിഹരിക്കാനും കഴിയും.
2012-ല്‍ മിനി തടയണയ്ക്കായി ജലസേചന വകുപ്പ് സര്‍വ്വേ നടത്തിയിരുന്നുവെങ്കിലും അതും ഇതുവരെ നടന്നിട്ടില്ല.ലെക്കിടി-പേരൂര്‍ പഞ്ചായത്തും ഒറ്റപ്പാലം മുന്‍സിപ്പാലിറ്റിയും ഉള്‍പ്പെട്ടുന്ന സ്ഥലമാണ് ഇത്.ഏങ്കിലും ഒരു സഹായസഹകരണങ്ങളും ഇവിടെനിന്നും ലഭിക്കുന്നില്ലെന്നും ഈ പദ്ധതി ഇതെ അവസ്ഥയില്‍ നിലനില്‍ക്കുകയാണെങ്കില്‍ ഇവിടത്തെ നെല്‍ക്കൃഷി അന്യം നിന്നുപോകുമെന്നും പല്ലാര്‍മംഗലം പാടശേഖരസമിതി സെക്രട്ടറി ടി.കെ.വിനോദ് പറഞ്ഞു.
1967 ലാണ് കര്‍ഷകര്‍ക്ക് വേണ്ടി പല്ലാര്‍മംഗലം ലിഫ്റ്റ് ഇറിഗേഷന്‍ പ്രവര്‍ത്തനം ആരംഭിച്ചത്.അന്ന് 250 ഹെക്ടറോളം ഭൂമിയില്‍ കൃഷിചെയ്യാനായി ഇവിടെ നിന്നാണ് ജലസേചനം നടത്തിയിരുന്നത്.അതില്‍ 150 ഹെക്ടറോളം ഭൂമിയില്‍ നെല്‍ക്കൃഷി ചെയ്തിരുന്നു.കൂടാതെ തെങ്ങ്,കവുങ്ങ്,വാഴ തുടങ്ങിയവയും കൃഷി ചെയ്തിരുന്നു.പല്ലാര്‍മംഗലം, അടിയംപാടം എന്നി രണ്ട് പാടശേഖരസമിതികള്‍ ഉള്‍പ്പെട്ടുന്നതാണ് ഈ ഇറിഗേഷന്‍. പല്ലാര്‍മംഗലം ലിഫ്റ്റ് ഇറിഗേഷന്‍ പുതുക്കിപണിയണമെന്നാവശ്യപ്പെട്ടു കൊണ്ടും ഇതിനോടനുബന്ധിച്ച് ഒരു മിനി തടയണ നിര്‍മ്മിക്കണമെന്നാവശ്യപ്പെട്ടു കൊണ്ടും ഈ പാടശേഖരസമിതികള്‍ അധികൃതര്‍ക്ക് പരാതി നല്‍കിയെങ്കിലും നടപടിയൊന്നും ഇതുവരെ ഉണ്ടായിട്ടില്ല.ഈ ലിഫ്റ്റ് ഇറിഗേഷന്‍ നന്നാക്കുകയാണെങ്കില്‍ മൂന്നു വിള നെല്‍ക്കൃഷിചെയ്യാന്‍ കഴിയുമെന്ന്കര്‍ഷകര്‍പറഞ്ഞു.