ഇരിട്ടി: കാട്ടാന ഭീതിയൊഴിയാതെ ആറളം ഫാം. കഴിഞ്ഞദിവസം കാട്ടാനയുടെ മുന്നില്‍നിന്ന് രണ്ട് തൊഴിലാളികള്‍ രക്ഷപ്പെട്ടത് തലനാരിയഴ്ക്ക്.
ഒറ്റയാന്റെ മുന്നില്‍പ്പെട്ട തൊഴിലാളികളുടെ പിന്നാലെ ഏറെദൂരമാണ് ആന ഓടിയത്. ആറളംഫാമിലെ പാട്ടത്തിനെടുത്ത തെങ്ങിന്‍ തോട്ടത്തില്‍നിന്ന് കുരങ്ങിനെ ഓടിക്കുന്ന തൊഴിലാളികളായ ജോസ്, ടിജോ എന്നിവരാണ് ഇന്നലെ രാവിലെ ഒറ്റയാന്റെ മുന്നില്‍പ്പെട്ടത്. ഏറെ ദൂരം ഓടിച്ചശേഷം ഇരുവരും സമീപത്തെ മതില്‍ ചാടി രക്ഷപ്പെടുകയായിരുന്നു.
മൂന്നാം ബ്ലോക്കിലെ നാല് തെങ്ങുകളും ആന കുത്തി വീഴ്ത്തി. കഴിഞ്ഞ രാത്രിയാണ് ആനക്കൂട്ടം വനാതിര്‍ത്തിയോട് ചേര്‍ന്ന് ഒന്‍പതാം ബ്ലോക്കില്‍ ആനമതില്‍ തകര്‍ത്തത്. മതില്‍ തകര്‍ന്ന ഭാഗത്തുകൂടി കൂടുതല്‍ ആനകള്‍ ആദിവാസി പുനരധിവാസ മേഖലയിലേക്കും ഫാമിന്റെ അധീന മേഖലയിലേക്കും കടക്കുന്നതായാണ് സംശയം.