കൊല്ലം: ശക്തികുളങ്ങരയിലെ സാഗരതാര കുരിശടിയിലെ രൂപക്കൂടു തകര്‍ത്തു മോഷണം. രൂപക്കൂടിന്റെ ചില്ലുകള്‍ തകര്‍ത്ത ശേഷം മാതാവിന്റെ കൈയിലെ സ്വര്‍ണം പൂശിയ ജപമാല മോഷ്ടാക്കള്‍ അപഹരിച്ചു. പാതയോരത്തു സ്ഥിതി ചെയ്യുന്ന കുരിശടിയിലാണു മോഷണം നടന്നത്. കുരിശടിയിലെ വിവിധ ഭാഗങ്ങളില്‍ സ്ഥാപിച്ചിരുന്ന വഞ്ചികളും കുത്തിതുറക്കാന്‍ മോഷ്ടാക്കള്‍ ശ്രമിച്ചു.
രാവിലെ കുരിശടിയില്‍ പ്രാര്‍ഥനക്ക് എത്തിയ വിശ്വാസികളാണു രൂപക്കൂടു തകര്‍ന്ന നിലയില്‍ കണ്ടത്. അധികൃതരെ വിവരം അറിയിച്ചതിനെത്തുടര്‍ന്ന് പൊലിസെത്തി പരിശോധന നടത്തി. വിരലടയാള വിദഗ്ധരും ഡോഗ് സ്‌ക്വാഡും എത്തി ശാസ്ത്രീയ തെളിവുകള്‍ ശേഖരിച്ചു. എഴുപത് വര്‍ഷം പഴക്കമുള്ള കുരിശടിയില്‍ ആദ്യമായാണ് മോഷണം നടക്കുന്നത്. ശക്തികുളങ്ങര എസ്.ഐ ദീപുവിന്റെ നേതൃത്വത്തില്‍ അന്വേഷണം ആരംഭിച്ചു.