കോഴിക്കോട്: കേന്ദ്ര സര്‍ക്കാര്‍ അംഗീകരിച്ച പുതിയ ദേശീയ വിദ്യാഭ്യാസ നയം സങ്കുചിത താല്‍പര്യത്തിന്റെ സൃഷ്ടിയെന്ന് മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി എം.പി. കെ.എസ്.ടി.യു സംസ്ഥാന കമ്മിറ്റി ദേശീയ വിദ്യാഭ്യാസ നയം അകവും പുറവും എന്ന വിഷയത്തില്‍ സംഘടിപ്പിച്ച വെബിനാര്‍ ഉദ്ഘാടനം ചെയ്യുകയായിരുന്നു അദ്ദേഹം. 

ഭരണഘടനാ തത്വങ്ങളും രാജ്യം പതിറ്റാണ്ടുകളായി ഉയര്‍ത്തിപ്പിടിക്കുന്ന മതേതര മൂല്യങ്ങളും പുതിയ നയത്തില്‍ പരാമര്‍ശിക്കുന്നില്ല. നിര്‍മിത ബുദ്ധിയുടെ കാലത്ത് പഴയകാലത്തെ വിദ്യാഭ്യാസമാണ് ഉചിതമെന്ന് പറയുന്നത് പരിഷ്‌കൃത സമൂഹത്തിന് യോജിച്ചതല്ല. 

ഈ നയം നടപ്പാക്കിയാല്‍ രാജ്യത്തെ പിന്നാക്ക, ന്യൂനപക്ഷ വിഭാഗങ്ങള്‍ വിദ്യാഭ്യാസ മേഖലയില്‍നിന്ന് പുറംതള്ളപ്പെടും. സംവരണമടക്കം നഷ്ടമാകുമെന്നും അദ്ദേഹം പറഞ്ഞു. 1986ലെ ദേശീയ വിദ്യാഭ്യാസ നയത്തിന്റെ ലക്ഷ്യം ഭരണഘടനാധിഷ്ഠിത  ദേശീയബോധത്തിലൂന്നിയ ഉത്തമ പൗരന്റെ രൂപവല്‍ക്കരണമായിരുന്നെങ്കില്‍ പുതിയ നയം ഏകശിലാത്മകതയാണ് ലക്ഷ്യം വയ്ക്കുന്നതെന്ന് മുഖ്യപ്രഭാഷണം നടത്തിയ മുസ്‌ലിം ലീഗ് ദേശീയ ഓര്‍ഗനൈസിങ് സെക്രട്ടറി ഇ.ടി മുഹമ്മദ് ബഷീര്‍ എം.പി പറഞ്ഞു. 

എസ്.സി.ഇ.ആര്‍.ടി ഡയരക്ടര്‍  ഡോ.ജെ പ്രസാദ്, മുന്‍ റിസര്‍ച്ച് ഓഫിസര്‍  കെ.വി മനോജ് എന്നിവരും ചര്‍ച്ചയില്‍ പങ്കെടുത്തു. 

സി.പി ചെറിയ മുഹമ്മദ് മോഡറേറ്ററായി. കെ.എസ്.ടി.യു സംസ്ഥാന പ്രഡിഡന്റ് അബ്ദുല്ല വാവൂര്‍ അധ്യക്ഷത വഹിച്ചു. എ. കെ സൈനുദ്ധീന്‍, കരീം പടുകുണ്ടില്‍, ബഷീര്‍ ചെറിയാണ്ടി സംസാരിച്ചു.