തിരുവനന്തപുരം: കൊവിഡ് സാഹചര്യത്തില്‍ സംസ്ഥാന സിലബസ് വെട്ടിക്കുറയ്ക്കണമെന്ന് കേരള അംഗീകൃത സ്‌കൂള്‍ മാനേജ്‌മെന്റ്‌സ് അസോസിയേഷന്‍. സംസ്ഥാനത്തെ സ്‌കൂള്‍ വിദ്യാര്‍ഥികള്‍ക്ക് ഓണ്‍ലൈന്‍ ക്ലാസ് തുടങ്ങി ആദ്യ ടേം അവസാനിക്കാറായിട്ടും സിലബസ് വെട്ടിക്കുറയ്ക്കുന്നത് സംബന്ധിച്ച് സര്‍ക്കാര്‍ തീരുമാനം എടുത്തിട്ടില്ല. 

സാധാരണ സ്‌കൂള്‍ സമയം ആറ് മണിക്കൂറാണ്. ഇതില്‍ ഒരുമണിക്കൂര്‍ ഉച്ചഭക്ഷണത്തിനും മറ്റുമായി നല്‍കിയ ശേഷം അഞ്ച് മണിക്കൂറാണ് പഠനത്തിനായി ചെലവഴിക്കുക. എന്നാല്‍, നിലവില്‍ ദിവസം അരമണിക്കൂര്‍ മാത്രമാണ് ഒരു സ്റ്റാന്‍ഡേര്‍ഡിന് ക്ലാസ് നടക്കുന്നത്. 

അതുകൊണ്ട് തന്നെ മുഴുവന്‍ പാഠങ്ങളും പഠിപ്പിച്ച് തീര്‍ക്കാന്‍ കഴിയില്ല. സിലബസ് വെട്ടിക്കുറയ്ക്കുകയല്ലാതെ മറ്റ് മാര്‍ഗങ്ങളില്ല. എത്രയും വേഗം സിലബസ് പരിഷ്‌കരിച്ച് നല്‍കിയില്ലെങ്കില്‍ സംസ്ഥാന സിലബസില്‍ പഠിക്കുന്ന വിദ്യാര്‍ഥികളുടെ ഭാവിയെ ഗുരുതരമായി ബാധിക്കുമെന്നും കെ.ആര്‍.എസ്.എം.എ സംസ്ഥാന പ്രസിഡന്റ് പി.കെ മുഹമ്മദ് ഹാജി, ജനറല്‍ സെക്രട്ടറി ആനന്ദ് കണ്ണശ എന്നിവര്‍ വാര്‍ത്താകുറിപ്പില്‍ അറിയിച്ചു.