കോഴിക്കോട്: മൂന്നാറിലെ പെട്ടിമുടിയിലുണ്ടായ ദുരന്തത്തോട് സംസ്ഥാന സര്‍ക്കാര്‍ നിഷേധാത്മക സമീപനം അവസാനിപ്പിക്കണമെന്ന് മുസ്‌ലിംലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ് ആവശ്യപ്പെട്ടു. സംസ്ഥാനം സമീപ കാലത്ത് കണ്ട ഏറ്റവും വലിയ ദുരന്തം നടന്നിട്ടും അവിടെ എത്താന്‍ കൂട്ടാക്കാത്ത മുഖ്യമന്ത്രി പിണറായി വിജയന്റെ നടപടി ഒരു ഭരണാധികാരിക്ക് ഭൂഷണമല്ല. ഇത്തരം ദുരന്തങ്ങളില്‍ പരുക്കേറ്റവരെ ആശുപത്രിയിലെത്തിക്കാനും ആരോഗ്യരക്ഷാ പ്രവര്‍ത്തകരെ സംഭവ സ്ഥലത്ത് എത്തിക്കാനും ഉപയോഗിക്കേണ്ട സര്‍ക്കാര്‍ ലക്ഷങ്ങള്‍ ചെലവഴിച്ച് വാടകക്ക് എടുത്ത ഹെലിക്കോപ്റ്റര്‍ പോലും വിട്ടു കൊടുത്തില്ലന്നും അദ്ദേഹം പ്രസ്താവനയില്‍ പറഞ്ഞു.

 പ്രതിപക്ഷ നേതാവും കേന്ദ്ര മന്ത്രിയും ദുരന്ത ഭൂമിയിലെത്തി കാര്യങ്ങള്‍ നേരിട്ട് മനസിലാക്കി ഇടപെട്ടപ്പോഴും ദിവസങ്ങളായിട്ടും അവിടെ പോകാന്‍ കൂട്ടാക്കാത്ത മുഖ്യമന്ത്രിയുടെ നിലപാട് പ്രതിഷേധാര്‍ഹമാണ്. കവളപ്പാറയില്‍ രണ്ടു വര്‍ഷം മുന്‍പ് ഉരുള്‍പൊട്ടി 14 പേര്‍ മരിച്ചപ്പോഴും സമാനമായിരുന്നു മുഖ്യമന്ത്രിയുടെ സമീപനം. ഇന്നേവരെ അവിടെ പോവാന്‍ അദ്ദേഹം കൂട്ടാക്കിയിട്ടില്ല. 

കരിപ്പൂരില്‍ വിമാന അപകടം നടന്ന് മിനുട്ടുകള്‍ക്കകം നാട്ടുകാര്‍ സ്വയം മുന്നോട്ടു വന്ന് ടി.വി ഇബ്‌റാഹീമിന്റെ നേതൃത്വത്തിലാണ് രക്ഷാ പ്രവര്‍ത്തനം നടത്തിയത്. എം.പിമാരായ പി.കെ കുഞ്ഞാലിക്കുട്ടി, ഇ.ടി മുഹമ്മദ് ബഷീര്‍, പി.വി അബ്ദുല്‍ വഹാബ്, എം.കെ രാഘവന്‍ തുടങ്ങിയ ജനപ്രതിനിധികളും ജില്ലാ കലക്ടര്‍മാരും ചേര്‍ന്ന് രക്ഷാ ദൗത്യം പൂര്‍ത്തിയാക്കിയ ശേഷമാണ് ഒരു സംസ്ഥാന മന്ത്രി പോലും അവിടെ എത്തിയത്. ഇതിന്റെ ജാള്യത മറക്കാന്‍ ഗവര്‍ണര്‍ക്കൊപ്പം കരിപ്പൂരിലും കോഴിക്കോട്ടും എത്തിയ മുഖ്യമന്ത്രിക്ക് അതേ ഹെലിക്കോപ്റ്ററില്‍ പിറ്റേ ദിവസമെങ്കിലും മൂന്നാറിലെ പെട്ടിമുടിയില്‍ എത്താമായിരുന്നു. രണ്ടു ദുരന്തങ്ങളില്‍ പെട്ടവര്‍ക്ക് ഒരേ ദിവസം നഷ്ടപരിഹാരം പ്രഖ്യാപിക്കുമ്പോള്‍ തുല്യത പാലിക്കാനുള്ള മര്യാദപോലും കാണിച്ചില്ല. വിമാന അപകടത്തില്‍ പെട്ടവര്‍ക്ക് പത്തു ലക്ഷം നഷ്ടപരിഹാരം പ്രഖ്യാപിച്ചതുപോലെ പെട്ടിമുടിയില്‍ എല്ലാ നഷ്ടപ്പെട്ടവരുടെ കുടുംബങ്ങളോടുള്ള വിവേചനം അവസാനിപ്പിക്കണമെന്നും കെ.പി.എ മജീദ് ആവശ്യപ്പെട്ടു.