നീലേശ്വരം: ബി.ജെ.പിക്ക് ബദല്‍ കോണ്‍ഗ്രസ് അല്ലെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. എല്‍.ഡി.എഫ് വിജയിച്ചാല്‍ മാത്രമെ ബി.ജെ.പിയെ പുറത്താക്കാന്‍ കഴിയുകയുള്ളുവെന്നും അദ്ദേഹം പറഞ്ഞു. എല്‍.ഡി.എഫ് നീലേശ്വരം മുനിസിപ്പല്‍ റാലി ഉദ്ഘാടനം ചെയ്യുകയായിരുന്നു കോടിയേരി.
കോണ്‍ഗ്രസ് എം.പിമാര്‍ ജയിച്ചാല്‍ അവര്‍ നാളെ ബി.ജെ.പിയിലേക്ക് പോകും. ഈ തെരഞ്ഞെടുപ്പില്‍ ഒരു കക്ഷിക്കും ഭൂരിപക്ഷം കിട്ടില്ല. വര്‍ഗീയതക്കെതിരായ പോരാട്ടം പാര്‍ലമെന്റില്‍ പ്രതിഫലിക്കാന്‍ ഇടതുപക്ഷം ജയിക്കണം. അധികാരം ഉണ്ടായപ്പോള്‍ കോണ്‍ഗ്രസ് ന്യൂനപക്ഷങ്ങളെ സംരക്ഷിച്ചിട്ടില്ലെന്നും ഇവിടെ കോണ്‍ഗ്രസും ബി.ജെ.പിയും ഒത്തുകളിക്കുകയാണെന്നും കോടിയേരി കൂട്ടിചേര്‍ത്തു.  പി. വിജയകുമാര്‍ അധ്യക്ഷനായി. ഗോവിന്ദന്‍ പള്ളിക്കാപ്പില്‍, പി. കരുണാകരന്‍ എം.പി, എം. രാജഗോപാലന്‍ എം.എല്‍.എ, പ്രൊഫ.കെ.പി ജയരാജന്‍, അസീസ് കടപ്പുറം, എം.വി ബാലകൃഷ്ണന്‍, കെ. ബാലകൃഷ്ണന്‍ സംസാരിച്ചു.