വണ്ടൂര്‍:ചില്ലറ വില്‍പനയ്ക്കായി ചെറു പൊതികളിലാക്കി കഞ്ചാവ് കടത്തികൊണ്ടുവന്നയാളെയും മൊത്ത വിതരണക്കാരനെയും വണ്ടൂര്‍ എക്‌സൈസ് സംഘം അറസ്റ്റു ചെയ്തു. വാഹന പരിശോധനക്കിടെയാണ് തിരുവാലി തോടായത്ത് വച്ചാണ് പിടികൂടിയത്. ഒന്നര ലക്ഷത്തിലേറെ വിലവരുന്ന  ഡ്യൂക്ക്  മോട്ടോര്‍ സൈക്കിളില്‍ കറങ്ങി നടന്ന് ചെറുപ്പക്കാര്‍ക്കിടയില്‍ കഞ്ചാവ് വില്‍പന നടത്തിയ തിരൂരങ്ങാടി കണ്ണമംഗലം വാളക്കുളം ദേശത്ത് പൂവില്‍ സുബൈറി ( 22)നെ എക്‌സൈസ് ഇന്‍സ്‌പെക്ടര്‍ കെ.ടി സജിമോനും സംഘവും അറസ്റ്റു ചെയ്തത്. ഇയാളില്‍ നിന്ന് 50 ചെറു പൊതികളിലായി 200 ഗ്രാം കഞ്ചാവ് കണ്ടെടുത്തു. 300 രൂപയ്ക്കാണ് ഒരു പൊതി കഞ്ചാവ് വില്‍ക്കുന്നത്.
തുടര്‍ന്ന് നടത്തിയ ചോദ്യംചെയ്യലില്‍ തിരൂരങ്ങാടി ചേലക്കോട് ദേശത്ത് പുത്തലത്ത് അബ്ദുല്‍ സലാം ( 43 ) എന്ന കഞ്ചാവ് മൊത്ത കച്ചവടക്കാരനാണ് ഇത് നല്‍കിയതെന്ന് മൊഴി നല്‍കി.
തുടര്‍ന്ന് തിരൂരങ്ങാടി എക്‌സൈസ് സര്‍ക്കിള്‍ ഇന്‍സ്‌പെക്ടര്‍ എം.രാഗേഷിന്റെ നേതൃത്വത്തില്‍ നടത്തിയ വീട് പരിശോധനയില്‍ അരക്കിലോ കഞ്ചാവ് ഇയാളുടെ വീട്ടില്‍ നിന്നും പിടിച്ചെടുത്തു. സുബൈര്‍ പിടിയിലായതറിഞ്ഞ് വീട്ടില്‍ സൂക്ഷിച്ചിരുന്ന രണ്ട് കിലോയോളം കഞ്ചാവ് കക്കൂസ് ടാങ്കില്‍ ഇട്ട് നശിപ്പിച്ചെന്നും അധികൃതര്‍ പറഞ്ഞു. കൂടാതെ 150 പായ്ക്കറ്റ് നിരോധിത പുകയില ഉല്‍പന്നവും ഇയാളുടെ വീട്ടില്‍ നിന്നും കണ്ടെടുത്തു. രണ്ടു പേരെയും കോടതിയില്‍ ഹാജരാക്കി റിമാന്‍ഡ് ചെയ്തു. പ്രിവന്റീവ് ഓഫിസര്‍മാരായ ടി.ഷിജുമോന്‍, എന്‍.വിജയന്‍, സി.ഇ.ഒമാരായ കെ.പി സാജിദ്, ആര്‍.പി സുരേഷ് ബാബു, സുധാകരന്‍ നേതൃത്വം നല്‍കി.