തളിപ്പറമ്പ്: പരിയാരം ഏമ്പേറ്റില്‍ വീട് കുത്തിത്തുറന്ന് മോഷണം. കണ്ണൂര്‍ ഗവ. മെഡിക്കല്‍ കോളജിലെ മെഡിസിന്‍ വിഭാഗത്തിലെ ഡോ. ബാലകൃഷ്ണന്‍ വള്ളിയോട്ടിന്റെ ഏമ്പേറ്റിലെ വീട്ടില്‍ വിഷുദിവസം പുലര്‍ച്ചെ ഒന്നരയോടെയായിരുന്നു കവര്‍ച്ച. അകത്തുകടന്ന മോഷ്ടാവ് ബാലകൃഷ്ണന്റെ പഴ്‌സില്‍നിന്ന് 15,000 രൂപ മോഷ്ടിച്ചു. ബാലകൃഷ്ണനും ഭാര്യ ഡോ. സുധയുമാണ് വീട്ടിലുണ്ടായിരുന്നത്.
മോഷ്ടാവ് ഇരുവരും ഉറങ്ങിക്കിടന്ന ബെഡ്‌റൂമിന്റെ വാതില്‍ തകര്‍ക്കാന്‍ ശ്രമിച്ചപ്പോഴാണ് ശബ്ദംകേട്ട് ഡോക്ടര്‍ ഉണര്‍ന്നത്. ഉടന്‍ പൊലിസില്‍ വിവരമറിയിക്കുകയായിരുന്നു. വിവരമറിഞ്ഞെത്തിയ പരിയാരം എ.എസ്.ഐ സി.ജി സാംസണിന്റെ നേതൃത്വത്തിലുള്ള പൊലിസ് സംഘം പ്രദേശത്ത് തിരച്ചില്‍ നടത്തിയെങ്കിലും മോഷ്ടാവിനെ കണ്ടെത്താനായില്ല. വിരലടയാള വിദഗ്ധര്‍ ഉള്‍പ്പെടെയുള്ളവര്‍ സ്ഥലത്തെത്തി അന്വേഷണം നടത്തി.