തേഞ്ഞിപ്പലം: അപകടമേഖലയായ ദേശീയപാത പാണമ്പ്രയില്‍ ഡിവൈഡര്‍ വീണ്ടും തകര്‍ന്നു. കഴിഞ്ഞ ദിവസം കാറിടിച്ചാണ് റോഡിലെ ഡിവൈഡര്‍ പൊളിഞ്ഞത്. വാഹനങ്ങള്‍ ഇടിച്ചു നിരവധി തവണ ഇവിടെ ഡിവൈഡറുകള്‍ തകരുകയാണ്.
രാത്രി സമയങ്ങളിലാണ് പലപ്പോഴും വാഹനങ്ങള്‍ ഡിവൈഡറുകളില്‍ കേറുന്നത്. നേരത്തേ ഡിവൈഡറുകളില്‍ സ്ഥാപിച്ച റിഫ്‌ളക്ടറുകളുടെ പ്രവര്‍ത്തനം പല സ്ഥലങ്ങളിലും നിലച്ചമട്ടാണ്. തകര്‍ന്ന ഡിവൈഡര്‍ വേഗത്തില്‍ നവീകരിക്കണമെന്ന ആവശ്യം ശക്തമായിട്ടുണ്ട്. വര്‍ഷങ്ങള്‍ക്കു മുന്‍പു ചലച്ചിത്രതാരം ജഗതി ശ്രീകുമാര്‍ അപകടത്തില്‍പെട്ടത് ഈ ഡിവൈഡറില്‍ വാഹനമിടിച്ചാണ്. ദേശീയപാതയിലെ സ്ഥിരം അപകടമേഖലയായി മാറിയിരിക്കുകയാണിപ്പോള്‍ പാണമ്പ്ര വളവ്. അപകട മേഖലയാണെന്നറിഞ്ഞിട്ടും ഡിവൈഡറിന്റെ തകര്‍ന്ന ഭാഗങ്ങള്‍ നന്നാക്കാന്‍ അധികൃതര്‍ തയാറാകാത്തതു പ്രതിഷേധത്തിനടയാക്കിയിട്ടുണ്ട്.