തൃപ്രയാര്‍: രാജ്യത്തിന്റെ മതേതര പൈതൃകം വീണ്ടെടുക്കുന്നതിനും കാത്തുസംരക്ഷിക്കുന്നതിനും വേണ്ടി ജനാധിപത്യചേരിയെ ശക്തിപ്പെടുത്തണമെന്ന് പാണക്കാട് സാദിഖലി ശിഹാബ് തങ്ങള്‍ അഭിപ്രായപ്പെട്ടു. ഐക്യജനാധിപത്യമുന്നണി സ്ഥാനാര്‍ഥി ടി.എന്‍ പ്രതാപന്റെ തെരഞ്ഞെടുപ്പ് പ്രചാരണാര്‍ഥം തളിക്കുളം സബ്‌സെന്റര്‍ പരിസരത്ത് നടന്ന കുടുംബസംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു തങ്ങള്‍. തെരഞ്ഞെടുപ്പ് പരാജയം ബോധ്യപ്പെട്ട ഫാസിസ്റ്റ് ശക്തികള്‍ ജനങ്ങളില്‍ സാമുദായികമായ വേര്‍തിരിവുകള്‍ സൃഷ്ടിച്ചിക്കുന്നതിനും മതസ്പര്‍ദ്ദയിലൂടെ രാജ്യത്തിന്റെ സൗഹൃദ അന്തരീക്ഷം തകര്‍ക്കുന്നതിനും ശ്രമിക്കുകയാണെന്നും തങ്ങള്‍ പറഞ്ഞു. യു.ഡി.എഫ് തളിക്കുളം പഞ്ചായത്ത് തെരഞ്ഞെടുപ്പ് കമ്മിറ്റി ചെയര്‍മാന്‍ പി.എം അബ്ദുല്‍ ജബ്ബാര്‍ അധ്യക്ഷനായി. മുസ്‌ലിം ലീഗ് ജില്ലാ പ്രസിഡന്റ് സി.എ.മുഹമ്മദ് റഷീദ് മുഖ്യപ്രഭാഷണം നടത്തി. യു.ഡി.എഫ് പഞ്ചായത്ത് തെരഞ്ഞെടുപ്പ് കമ്മിറ്റി ജനറല്‍ കണ്‍വീനര്‍ പി.എ അബ്ദുല്‍ ഗഫൂര്‍, ടി.വി ശ്രീജിത്ത്, എം.കെ മുഹമ്മദ് ഹുസൈന്‍ എന്നിവര്‍ സംസാരിച്ചു.