മേപ്പാടി: മഴക്കാലത്തും കുടിവെള്ളം തേടി അലയേണ്ട സ്ഥിതിയാണ് റിപ്പണ്‍ ആനടിക്കാപ്പ് കാട്ടുനായിക്ക കോളനിവാസികള്‍ക്ക്. കോളനിയില്‍ തന്നെ ലക്ഷങ്ങള്‍ മുടക്കി സ്ഥാപിച്ച കുടിവെള്ള പദ്ധതിയുണ്ടെങ്കിലും ഇതില്‍ നിന്നും കോളനിക്കാര്‍ക്ക് വെള്ളം കിട്ടുന്നില്ല.
2011ല്‍ രാജീവ് ഗാന്ധി കുടിവെള്ള പദ്ധതി ആരംഭിച്ചെങ്കിലും പൊതു വിഭാഗത്തില്‍പെട്ടവര്‍ക്ക് മാത്രമാണ് വെള്ളം ലഭിക്കുന്നത്. ഇപ്പോള്‍ വീടിന് മേല്‍കൂരയില്‍ വീഴുന്ന മഴവെള്ളം മാത്രമാണ് കോളനിക്കാരുടെ ആശ്രയം. മഴ പെയ്യാത്ത ദിവസം ജലം തേടി അലയണം. കാട്ടുനായ്ക്ക് വിഭാഗത്തില്‍പെടുന്ന 20 ഓളം കുടുംബങ്ങളാണ് താമിക്കുന്നത്. ആദിവാസികളുടെ പേരില്‍ ആരംഭിച്ച കുടിവെള്ള പദ്ധതിയില്‍ നിന്നും വെള്ളം നിഷേധിക്കുന്ന സംഭവത്തില്‍ നടപടി വേണമെന്നാവശ്യപ്പെട്ട് കോളനിക്കാര്‍ ജില്ലാ കലക്ടര്‍ക്ക് നിവേദനം നല്‍കും. നടപടി ആയില്ലങ്കില്‍ മനുഷ്യാവകാശ കമ്മിഷനും പരാതി നല്‍കുമെന്നും കോളനിക്കാര്‍ പറയുന്നു.