രാജ്‌കോട്ട്: സീസണില്‍ ആദ്യമായി സൂപ്പര്‍ ഓവറിലേക്ക് മത്സരം നീണ്ടപ്പോള്‍ മുംബൈ ഇന്ത്യന്‍സിനെതിരായ ഹോം പോരാട്ടത്തില്‍ ഗുജറാത്ത് ലയണ്‍സിന് പരാജയം. സൂപ്പര്‍ ഓവറില്‍ ആദ്യം ബാറ്റ് ചെയ്ത മുംബൈ രണ്ട് വിക്കറ്റ് നഷ്ടത്തില്‍ 11 റണ്‍സെടുത്തു. ഗുജറാത്തിന് ആറ് പന്തില്‍ ആറ് റണ്‍സെടുക്കാനെ സാധിച്ചുള്ളു. സൂപ്പര്‍ ഓവര്‍ എറിഞ്ഞ ബുമ്‌റയുടെ ബൗളിങാണ് ഗുജറാത്തിന് വിജയം നിഷേധിച്ചത്.
നേരത്തെ ആദ്യം ബാറ്റ് ചെയ്ത ഗുജറാത്ത് നിശ്ചിത 20 ഓവറില്‍ ഒന്‍പത് വിക്കറ്റിന് 153 റണ്‍സെടുത്തപ്പോള്‍ മുംബൈയുടെ പോരാട്ടം 20 ഓവറില്‍ 153ല്‍ അവസാനിച്ചു. ലക്ഷ്യത്തിലേക്ക് ബാറ്റേന്തിയ മുംബൈയ്ക്ക് അവസാന രണ്ടോവറില്‍ പിണഞ്ഞ മൂന്ന് റണ്ണൗട്ടുകള്‍ വിജയം നിഷേധിച്ചു. വിജയ പരാജയങ്ങള്‍ മാറിമറിഞ്ഞ മത്സരത്തില്‍ 19ാം ഓവറില്‍ നാല് റണ്‍സ് മാത്രം വഴങ്ങി രണ്ട് വിക്കറ്റ് വീഴ്ത്തിയ മലയാളി പേസര്‍ ബേസില്‍ തമ്പിയുടെ നിര്‍ണായക പ്രകടനമാണ് ഗുജറാത്തിന് വിജയ പ്രതീക്ഷ നല്‍കിയത്. മത്സരത്തില്‍ നാലോവറില്‍ 29 റണ്‍സ് വഴങ്ങി ബേസില്‍ മൂന്ന് വിക്കറ്റുകള്‍ വീഴ്ത്തി. മുബൈ നിരയില്‍ ഓപണര്‍ പാര്‍ഥിവ് പട്ടേല്‍ 70 റണ്‍സെടുത്തു. ഹര്‍ദിക് പാണ്ഡ്യ 29 റണ്‍സെത്തു.
ഓപണര്‍ ഇഷാന്‍ കിഷന്‍ (48) ഗുജറാത്തിന്റെ ടോപ് സ്‌കോററായപ്പോള്‍ വമ്പനടിക്കാരെല്ലാം പരാജയപ്പെട്ടത് അവര്‍ക്ക് തിരിച്ചടിയായി. ജഡേജ (28), ഫോക്‌നര്‍ (21) ആന്‍ഡ്രു ടൈ (12 പന്തില്‍ 25 റണ്‍സ് ) എന്നിവരുടെ ബാറ്റിങാണ് ഗുജറാത്തിനെ പൊരുതാവുന്ന നിലയിലെത്തിച്ചത്. മുംബൈയ്ക്കായി ക്രുനല്‍ പാണ്ഡ്യ നാലോവറില്‍ 14 റണ്‍സ് മാത്രം വഴങ്ങി മൂന്ന് വിക്കറ്റെടുത്തു.