വല്ലപ്പുഴ: പേങ്ങാട്ടിരിയില്‍ തെരുവ് നായ് മുന്നില്‍ ചാടി ഓട്ടോ മറിഞ്ഞ് മദ്‌റസ വിദ്യാര്‍ഥിക്ക് പരുക്കേറ്റു. ബീവിപ്പടിയില്‍ നിന്നും ചെര്‍പ്പുളശ്ശേരിയിലേക്ക് പോവുകയായിരുന്ന ഓട്ടോയുടെ മുന്‍പിലേക്ക് പേങ്ങാട്ടിരി കെ.എസ്.ഇ.ബി ഓഫിസിന് സമീപമാണ് അപകടം നടന്നത്. പരുക്കേറ്റ വിദ്യാര്‍ഥിയെ പെരിന്തല്‍മണ്ണയിലെ സ്വകാര്യ ആശുപത്രിയില്‍ പ്രവേശിപ്പിച്ചു. പരുക്ക് ഗുരുതരമല്ല. ഡ്രൈവര്‍ക്കും നിസ്സാര പരുക്കേറ്റിട്ടുണ്ട്. ഈ മേഖലയില്‍ സമീപ കാലത്തായി തെരുവ് നായ് ശല്യം രൂക്ഷമാണ്.
ഒരാഴ്ച്ച മുന്‍പാണ് പേപ്പട്ടിയുടെ ആക്രമണത്തില്‍ വിദ്യാര്‍ഥികളടക്കം നിരവധി പേര്‍ക്ക് കടിയേറ്റത്. അതിരാവിലെ മദ്‌റസയിലേക്ക് പോകുന്ന വിദ്യാര്‍ഥികളെയും മറ്റും തെരുവ് നായ്ക്കള്‍ ആക്രമിക്കുന്നത് പതിവായിട്ടുണ്ട്. അധികൃതര്‍ ജനങ്ങളുടെ ഭീതിയകറ്റാനുള്ള നടപടികളെടുക്കണമെന്ന ആവശ്യം ശക്തമാണ്.