കൊപ്പം: കുലുക്കല്ലൂര്‍ ഗ്രാമപഞ്ചായത്ത് പ്രസിഡന്റിനെതിരേ സ്വന്തം പാര്‍ട്ടിക്കാര്‍ കൊണ്ടുവന്ന അവിശ്വാസ പ്രമേയം പാസായതായി പ്രഖ്യാപിച്ച പ്രിസൈഡിംഗ് ഒഫിസര്‍ ഉച്ചക്ക് ശേഷം മലക്കം മറിഞ്ഞ് ജനപ്രതിനിധികളെ ഞെട്ടിച്ചു. പ്രസിഡന്റ് എം.കെ നൂറുദ്ദീനെതിരെ കൊണ്ടുവന്ന അവിശ്വാസ പ്രമേയമാണ് പാസായതായി പട്ടാമ്പി ബ്ലോക്ക് പഞ്ചായത്ത് സെക്രട്ടറി എസ് ഹര്‍ഷന്‍ അറിയിച്ചത്. പതിനേഴ് അംഗങ്ങളില്‍ എട്ടുപേര്‍ മാത്രമാണ് അവിശ്വാസ പ്രമേയത്തെ അനുകൂലിച്ച് വോട്ട് ചെയ്തത്. പ്രസിഡന്റ് കോടതിയെ സമീപിക്കുമെന്ന സാഹചര്യം വന്നതോടെയാണ് സെക്രട്ടി തനിക്ക് തെറ്റു പറ്റിയതാണെന്ന പ്രസ്താവനയുമായി രംഗത്തു വന്നത്. നിയമവിരുദ്ധമായി തന്നെ പുറത്താക്കിയ സെക്രട്ടറിയുടെ നടപടിക്കെതിരേ നിയമനടപടിക്ക് ഒരുങ്ങുകയാണ് പ്രസിഡന്റ് നൂറുദ്ദീന്‍. യു.ഡി.എഫ് ഭരിക്കുന്ന കുലുക്കല്ലൂര്‍ ഗ്രാമപഞ്ചായത്തില്‍ പതിനേഴ് അംഗങ്ങളാണ് ഉള്ളത്. യു.ഡി.എഫ് 10, സി.പി.എം ആറ്, ബി.ജെ.പി ഒന്ന് എന്നിങ്ങനെയാണ് കക്ഷിനില. അവിശ്വാസ പ്രമേയ ചര്‍ച്ചയില്‍ യു.ഡി.എഫില്‍ നിന്ന് നിലവിലെ പ്രസിഡന്റും മറ്റൊരു മെംപറും പങ്കെടുത്തില്ല. സി.പി.എമ്മിന്റെ ആറു പേരും വിട്ടു നിന്നു. യു.ഡി.എഫില്‍ നിന്ന് എട്ട് അംഗങ്ങളും ബി.ജെ.പിയുടെ ഒരംഗവുമാണ് ചര്‍ച്ചയില്‍ പങ്കെടുത്തത്. എന്നാല്‍ ബി.ജെ.പി അംഗം അവിശ്വാസ പ്രമേയ വോട്ടെടുപ്പില്‍ നിന്നു വിട്ടുനിന്നതോടെ അവിശ്വാസ പ്രമേയത്തിന് അനുകൂലമായി യു.ഡി.എഫിലെ എട്ടുപേര്‍ മാത്രമാണ് വോട്ട് ചെയ്തത.് എന്നാല്‍ അവിശ്വാസ പ്രമേയചര്‍ച്ചയില്‍ പങ്കെടുത്ത ഒന്‍പതംഗങ്ങളില്‍ എട്ടു പേരുടെയും പിന്തുണയുള്ളതിനാലാണ് പ്രമേയം പാസായതെന്ന് നടപടിക്രമങ്ങള്‍ നിയന്ത്രിച്ച പട്ടാമ്പി ബ്ലോക്ക് പഞ്ചായത്ത് സെക്രട്ടറി എസ് ഹര്‍ഷന്‍ മാധ്യമങ്ങളെ അറിയിച്ചു. കോണ്‍ഗ്രസിലെ ഗ്രൂപ്പ് വഴക്ക് മൂലമാണ് തനിക്കെതിരേ അവിശ്വാസ പ്രമേയം കൊണ്ടുവന്നതെന്ന് നൂറുദ്ദീന്‍ പറഞ്ഞു.