മണ്ണാര്‍ക്കാട്: വിവിധ മോഷണക്കേസുകളിലെ പ്രതികളെ പൊലിസ് പിടികൂടി. വയനാട് മാനന്തവാടി പളിക്കല്‍ വീട്ടില്‍ ഹാരിസ് (38), അമ്പലവയല്‍ കാട്ടികുളം വീട്ടില്‍ ഹംസ (56) എന്നിവരെയാണ് മണ്ണാര്‍ക്കാട് പൊലിസ് കഴിഞ്ഞ ദിവസം വയനാട് വെച്ച് അറസ്റ്റ് ചെയ്തത്. 1996ല്‍ മണ്ണാര്‍ക്കാട്, കോട്ടോപ്പാടം, അലനല്ലൂര്‍ തുടങ്ങിയ മേഖലകളില്‍ നടന്ന റബര്‍ ഉള്‍പ്പെടെയുളള നിരവധി മോഷണകേസുകളില്‍ ഇവര്‍ പ്രതികളായിരുന്നു. ഇവരെ പൊലിസിന് പിടികൂടാന്‍ കഴിയാത്തതിനാല്‍ കോടതി പിടികിട്ടാപ്പുളളികളായി പ്രഖ്യാപിച്ചിരുന്നു.
പ്രതികള്‍ വയനാട്ടിലുണ്ടെന്ന രഹസ്യ വിവരത്തെ തുടര്‍ന്നാണ് മണ്ണാര്‍ക്കാട് പൊലിസ് എസ്.ഐ ഷിജു കെ എബ്രാഹാമിന്റെ നേതൃത്വത്തിലുളള സംഘം വയനാട് പോയി പ്രതികളെ അറസ്റ്റ് ചെയ്തത്. മോഷണ സംഘത്തിലെ ഉമ്മര്‍ എന്നയാളെ നേരത്തെ കോടതി ശിക്ഷിച്ചിരുന്നു. മറ്റൊരാള്‍ മരണപ്പെടുകയും ചെയ്തിട്ടുണ്ട്.