കൊച്ചി: സംസ്ഥാനത്തെ ക്വാറികളുടെ ദൂരപരിധി 200 മീറ്റര്‍ ആക്കി ഉയര്‍ത്തിയ ഹരിത ട്രൈബ്യൂണല്‍ ഉത്തരവ് ഹൈക്കോടതി സ്‌റ്റേ ചെയ്തു. ക്വാറി ഉടമകള്‍ നല്‍കിയ ഹരജിയിലാണ് കോടതി ഉത്തരവ്. ക്വാറികള്‍ പ്രവര്‍ത്തിക്കുന്നതിന് ഹരിത ട്രൈബ്യൂണല്‍ 200 മീറ്റര്‍ പരിധി നിശ്ചയിച്ചിരുന്നു.നിലവില്‍ 50 മീറ്റര്‍ പരിധിയിലാണ്.സര്‍ക്കാരിന്റെ സത്യവാങ്മൂലം കണക്കിലെടുത്താണ് ഹൈക്കോടതിയുടെ ഇടക്കാല സ്റ്റേ.

ജനവാസ കേന്ദ്രങ്ങളില്‍ നിന്ന് ക്വാറികളുടെ അകലം 50 മീറ്ററില്‍ നിന്ന് 200 മീറ്റര്‍ ആയി ഉയര്‍ത്തി കഴിഞ്ഞ മാസം 21ന് ഹരിത ട്രൈബ്യൂണല്‍ ഉത്തരവിട്ടിരിന്നു. ഇതിനെതിരെ ക്വാറി ഉടമകള്‍ ഹൈക്കോടതിയില്‍ സമര്‍പ്പിച്ച ഹര്‍ജിയില്‍ സര്‍ക്കാര്‍ അവര്‍ക്കനുകൂലമായി സത്യവാങ്മൂലം നല്‍കി. ഇത് കണക്കിലെടുത്താണ് ഹൈക്കോടതി ഹരിത ട്രൈബ്യൂണലിന്റെ ഉത്തരവ് താല്ക്കാലികമായി സ്റ്റേ ചെയ്തത്.

സംസ്ഥാനത്ത് പ്രവര്‍ത്തിക്കുന്ന ലൈസന്‍സുള്ള ക്വാറികളില്‍ ഭൂരിഭാഗവും 200 മീറ്റര്‍ ദൂരപരിധിയിലല്ല എന്നതിനാല്‍ ക്വാറി ഉടമകള്‍ക്ക് സഹായകരമാണ് സര്‍ക്കാര്‍ നിലപാട്.