തിരുവനന്തപുരം: സൈബര്‍ ആക്രമണങ്ങളില്‍ കൂടുതല്‍ പ്രതികരണവുമായി മുഖ്യമന്ത്രി പിണറായി വിജയന്‍. സൈബര്‍ ആക്രമണത്തില്‍ പ്രതപക്ഷ നേതാക്കളെയും സ്വന്തം എം.എല്‍.എമാരെ എങ്കിലും ഉപദേശിക്കുന്നത് നന്നാവുമെന്ന് അദ്ദേഹം പറഞ്ഞു. മാധ്യമപ്രവര്‍ത്തകരെ കോണ്‍ഗ്രസും ബി.ജെ.പിയും അധിക്ഷേപിച്ചിട്ടുണ്ട്.

സൈബര്‍ സ്‌പേസിലായാലും മീഡിയ സ്‌പേസിലായാലും വ്യക്തിപരമായ അധിക്ഷേപങ്ങള്‍ പാടില്ലെന്നുതന്നെയാണ് എന്നുമുള്ള നിലപാട്. ഈ വിവാദം നീട്ടിക്കൊണ്ടുപോകേണ്ടതുമില്ല.
എന്നാല്‍ അടുത്ത കാലത്തുണ്ടായ ചില സംഭവങ്ങളെക്കുറിച്ച് സൂചിപ്പിക്കാതിരിക്കാനാവില്ല. വനിതാ മന്ത്രിമാരെയും എഴുത്തുകാരെയും മാധ്യമ പ്രവര്‍ത്തകരേയും പ്രതിപക്ഷ എം.എല്‍.എമാരും നേതാക്കളും വെറുതെവിട്ടില്ല.

മന്ത്രി മേഴ്‌സിക്കുട്ടിയമ്മയും ആരോഗ്യമന്ത്രി കെ.കെ ഷൈലജയേയും വെറുതേവിടാത്തവര്‍ എഴുത്തുകാരായ ബെന്യാമിന്‍, കെ.ആര്‍ മീരയേയും കടന്നാക്രമിച്ചു. ഹനാന്‍ എന്ന പെണ്‍കുട്ടിയെപോലും കൊലവിളിച്ചില്ലേ. ഇതിന്റെ പേരില്‍ പലരേയും അറസ്റ്റു ചെയ്യുകയുമുണ്ടായി. ലോകം മുഴുവന്‍ അംഗീകരിച്ച കമ്മ്യൂണിസ്റ്റ് നേതാവ് എ.കെ.ജിയെപോലും കടന്നാക്രമിച്ചു. അതുകൊണ്ട് ഈ വിഷയത്തിന്റെ എല്ലാവശങ്ങളും പരിശോധിക്കണം. ഇരട്ടത്താപ്പ് പാടില്ലെന്നും മുഖ്യമന്ത്രി വ്യക്തമാക്കി.