ചെതലയം: ശക്തമായ കാറ്റിലും മഴയിലും കുടിലുകളുടെ മേല്‍ക്കൂര കാറ്റെടുത്തതോടെ ദുരിതത്തിലായി ഗോത്രവര്‍ഗ കുടുംബങ്ങള്‍.
ഇന്നലെ വൈകിട്ട് നാലോടെ മഴയ്ക്ക് മുന്നോടിയായി വീശിയടിച്ചകാറ്റിലാണ് കൊമ്പമൂലയിലെ ഗോത്രവര്‍ഗക്കാര്‍ താമസിക്കുന്ന കുടിലുകളുടെ മെല്‍ക്കൂര കാറ്റെടുത്തത്. കാറ്റിനുപിറകെ ശക്തമയി മഴയും കൂടിയെത്തിയതോടെ കുടുംബങ്ങള്‍ ഏറെ ദുരിതത്തിലായി. കുട്ടികളും സ്ത്രീകളും മുതിര്‍ന്നവരും വേറെ എവിടേക്കും മാറാനാവതെ മഴ നനയേണ്ടിവന്നു. ആറു കുടുംബങ്ങളിലായി 25 അംഗങ്ങളാണ് കോളനിയിലുള്ളത്. പിന്നീട് സംഭവമറിഞ്ഞെത്തിയവര്‍ ഇവരെ ചെതലയം പൂവഞ്ചിയിലെ സാംസ്‌ക്കാരിക നിലയത്തിലേക്ക് മാറ്റി. വിവരമറിഞ്ഞ് റവന്യു അധികൃതരും സ്ഥലത്തെത്തി വേണ്ട സൗകര്യങ്ങള്‍ ചെയ്തുകൊടുത്തു.  രണ്ട് വര്‍ഷം മുമ്പ് കുറിച്യാട് റെയ്ഞ്ചിലെ വനാന്തരഗ്രാമമായ കൊമ്മഞ്ചേരിയില്‍ നിന്നും മാറ്റി ചെതലയം വനാതിര്‍ത്തിയായ കൊമ്പമൂലയിലേക്ക് ഈ കുടുംബങ്ങളെ മാറ്റി പാര്‍പ്പിച്ചത്. ഇവര്‍ക്ക് എത്രയും പെട്ടന്ന് ഭൂമിവാങ്ങിനല്‍കി ഇവരെ ഇവിടെനിന്നും മാറ്റുമെന്ന് പറഞ്ഞിരുന്നെങ്കിലും ഇതുവരെ നടപടിയായിട്ടില്ല.