അന്തിക്കാട്: കൊയ്ത്ത് കഴിഞ്ഞ് കോള്‍ പടവുകളില്‍ ചാക്കിലാക്കി സൂക്ഷിച്ചിരിക്കുന്ന നെല്ല് കൊണ്ടു പോകുന്നതിന് അടിയന്തര നടപടി സ്വീകരിക്കുമെന്ന കൃഷിമന്ത്രി വി.എസ് സുനില്‍കുമാറിന്റെ വാക്ക് പാഴ് വാക്കായി. കാഞ്ഞാണിയില്‍ ഒരാഴ്ച മുന്‍പ് നടന്ന നെല്‍കര്‍ഷക സംഗമത്തിലാണ് വിളവെടുപ്പു കഴിഞ്ഞ് കോള്‍ പാടങ്ങളില്‍ കെട്ടികിടക്കുന്ന നെല്ല് ഉടന്‍ കൊണ്ടു പോകുന്നതിനുള്ള നടപടി സ്വീകരിക്കുമെന്ന് മന്ത്രി കര്‍ഷകര്‍ക്ക് ഉറപ്പ് നല്‍കിയത്. വാക്കുപാലിക്കാത്ത മന്ത്രിയുടെ നടപടിയില്‍ കര്‍ഷകര്‍ക്കിടയില്‍ പ്രതിഷേധം വ്യാപകമായിട്ടുണ്ട്.
എറവ് കൊടയാട്ടി കോള്‍പടവിലാണ് കൊയ്ത്ത് കഴിഞ്ഞ് ഒരാഴ്ചയായിട്ടും ക്വിന്റല്‍ കണക്കിന് നെല്ല് കെട്ടിക്കിടക്കുന്നത്. സപ്ലൈകോയില്‍ നിന്നും നെല്ല് സംഭരണം ഏറ്റെടുത്തിട്ടുള്ള സ്വകാര്യ മില്ലുകള്‍ക്ക് മതിയായ ഗോഡൗണുകള്‍ ഇല്ലാത്തതാണ് പ്രശ്‌നത്തിനു കാരണം.  ചാക്കിലാക്കി കോള്‍പാടത്ത് സൂക്ഷിച്ചിരിക്കുന്ന നെല്ലിനു കാവല്‍ നില്‍ക്കേണ്ട ഗതികേടിലാണ് കര്‍ഷകര്‍. മഴ പെയ്താല്‍ നെല്ല് നശിക്കുമെന്ന ഭീതിയും കര്‍ഷകര്‍ക്കുണ്ട്. നല്ല വിളവ് ലഭിച്ചിട്ടും നെല്ല് കൊണ്ടു പോകാത്തത് കര്‍ഷകര്‍ക്കു തിരിച്ചടിയായി. നെല്ല് സൂക്ഷിക്കാന്‍ ആവശ്യമായ ഗോഡൗണുകളുള്ള മില്ലുകള്‍ക്കു മാത്രം സപ്ലൈകോ നെല്ല് നല്‍കിയാല്‍ മതിയെന്നാണ് കര്‍ഷകര്‍ ആവശ്യപ്പെടുന്നത്.  എന്നാല്‍ സപ്ലൈകോയും മില്ലുടമകളും തമ്മിലുള്ള ഒത്തു കളിയാണ് ഇതിനു പിന്നിലെന്നും ആരോപണമുയര്‍ന്നിട്ടുണ്ട്. പാടത്തു നിന്നും ഉടന്‍ നെല്ല് കൊണ്ടു പോകുന്നതിനുള്ള നടപടി സ്വീകരിക്കണമെന്ന് കര്‍ഷകര്‍ ആവശ്യപ്പെട്ടു.