കുറ്റ്യാടി: കഴിഞ്ഞ ദിവസം വൈകിട്ട് ആഞ്ഞടിച്ച ശക്തമായ കാറ്റിലും മഴയിലും വീടിന് കനത്ത നാശനഷ്ടം. വേളം പെരുവയലിലെ ചേരമ്പത്ത് ഷാജിയുടെ വീടിനാണ് നാശം സംഭവിച്ചത്. വീടിന്റെ ഒരു ഭാഗം കാറ്റില്‍ പൂര്‍ണമായും തകരുകയും ഓടുകള്‍ പാറിപ്പോവുകയുമാണുണ്ടായത്. ഇരുപത്തയ്യായിരം രൂപയുടെ നഷ്ടം കണക്കാക്കുന്നു. ജനപ്രതിനിധികളായ വി.കെ അബ്ദുല്ല, പി.കെ സജീവന്‍, സി.എന്‍ അഹമ്മദ് ഹാജി, പി.കെ ദാമോദരന്‍, ടി. സുരേഷ് തുടങ്ങിയവര്‍ സ്ഥലം സന്ദര്‍ശിച്ചു.
വടകര: തെങ്ങ് വീണ് കാര്‍ തകര്‍ന്നു. ശീതള്‍ ക്യഷ്ണന്‍ എന്നയാളുടെ കാറാണ് തകര്‍ന്നത്. പുത്തൂര്‍ ഇടയത്ത് പൊയില്‍ ശ്രീധരന്റെ വീട്ടില്‍ വാടകയ്ക്ക് താമസിച്ചുവരികയായിരുന്നു ശീതള്‍ ക്യഷ്ണന്‍.
കുറ്റ്യാടി: വേനല്‍ മഴയോടൊപ്പം അടിച്ചു വീശിയ ശക്തമായ കാറ്റില്‍ മരക്കൊമ്പ് പൊട്ടിവീണ് ഗതാഗതം സ്തംഭിച്ചു. കുറ്റ്യാടി-നാദാപുരം സംസ്ഥാന പാതയിലെ നീലേച്ചുകുന്നിലാണ് സംഭവം. വൈകീട്ട് അഞ്ച് മണിയോടെ ഉണ്ടായ ശക്തമായ കാറ്റില്‍ മരക്കൊമ്പ് റോഡിലേക്ക് പൊട്ടിവീഴുകയായിരുന്നു. വൈദ്യുതി ലൈനില്‍ തട്ടി വീണതിനെ തുടര്‍ന്ന് വൈദ്യുതി വിഛേദിക്കപെടുകയും ചെയ്തു. നാദാപുരം ഫയര്‍ സര്‍വിസ് യൂനിറ്റ് എത്തി മരക്കൊമ്പുകള്‍ വെട്ടിമാറ്റി ഗതാഗതവും വൈദ്യുതിയും പുനഃസ്ഥാപിച്ചു. ഫയര്‍ ഓഫിസര്‍ പി.സി പ്രേമന്‍, കെ. അനില്‍കുമാര്‍, പ്രീയേഷ് പി. ശാഖിന്‍ നേതൃത്വം നല്‍കി. ഉള്ള്യേരി: കെട്ടിടത്തിനുമുകളില്‍ സ്ഥാപിച്ച അലൂമിനിയം റൂഫിങ് ഷീറ്റ് തകര്‍ന്നു വീണ് ഗതാഗതം തടസപ്പെട്ടു. ഇന്നലെ വൈകിട്ട് വീശിയിച്ച കാറ്റിലാണ് അന്‍പതു മീറ്ററോളം നീളത്തിലുള്ള ഷീറ്റ് ഇരുമ്പു പൈപ്പിനോടൊപ്പം റോഡിലേക്ക് വീണത്. ഇതോടെ ബാലുശ്ശേരി റോഡില്‍ മൂന്നുമണിക്കൂറോളം ഗതാഗതം പൂര്‍ണമായും തടസ്സപ്പെട്ടു.
ഷീറ്റ് തകര്‍ന്ന് റോഡിലേക്ക് വീണതോടെ ബാലുശ്ശേരി റോഡില്‍ മൂന്നുമണിക്കൂറോളം ഗതാഗതം പൂര്‍ണമായും തടസപ്പെട്ടു. ആര്‍ക്കും പരുക്കില്ല. എന്നാല്‍ കടയ്ക്കു മന്‍പില്‍ നിര്‍ത്തിയ മൂന്ന് കാറുകള്‍ തകര്‍ന്നു. അഞ്ച് വൈദ്യുതി തൂണുകള്‍ പൂര്‍ണമായും തകര്‍ന്നിട്ടുണ്ട്. പ്രദേശത്ത് വൈദ്യുതി ബന്ധം വിച്ഛേദിച്ചു.
കോഴിക്കോട് ബീച്ച്, കൊയിലാണ്ടി, പേരാമ്പ്ര എന്നിവിടങ്ങളില്‍ നിന്ന് ഫയര്‍ഫോഴ്‌സും അത്തോളി പൊലിസും സ്ഥലത്തെത്തിയാണ് രക്ഷാപ്രവര്‍ത്തനം നടത്തിയത്. കലക്ടര്‍ എസ്. സാംബശിവറാവുവിന്റെ നേതൃത്വത്തില്‍ ഉന്നത ഉദ്യോഗസ്ഥര്‍ സ്ഥലത്തെത്തി. ഷീറ്റിട്ട ഭാഗം അനധികൃതമായി നിര്‍മിച്ചതാണെന്നും വിശദീകരണം ആവശ്യപ്പെടുമെന്നും കലക്ടര്‍ പറഞ്ഞു. രാത്രി വൈകിയും ഷീറ്റുകള്‍ പൂര്‍ണമായും മാറ്റാനുള്ള നടപടികള്‍ നടന്നു വരികയാണ്.