സ്വന്തംവകുപ്പില്‍ നടന്ന ഗുരുതരമായ ഈ തട്ടിപ്പില്‍നിന്ന് അദ്ദേഹത്തിന് തലയൂരാന്‍ കഴിയില്ല

തിരുവനന്തപുരം: മുഖ്യമന്ത്രിയുടെ പെരുമാറ്റം സമനിലതെറ്റിയ നിലയിലെന്ന് പ്രതിപക്ഷ നേതാവ് രമേശ് ചെന്നിത്തല. മുഖ്യമന്ത്രിയുടെ ഓഫിസ് താവളമാക്കി തട്ടിപ്പ് നടത്തുകയും കമ്മിഷനടിക്കുകയും ചെയ്യുകയാണ്. 

തട്ടിപ്പ് നടത്തിയ സ്ത്രീയെക്കുറിച്ച് ഒരു മാധ്യമവും റിപ്പോര്‍ട്ട് ചെയ്യരുതെന്നാണ് മുഖ്യമന്ത്രി പറയുന്നത്. മാധ്യമപ്രവര്‍ത്തകരെ സമൂഹമാധ്യമങ്ങളിലൂടെ ആക്രമിക്കുന്നതിനെ സംവാദം എന്നാണ് മുഖ്യമന്ത്രി പറയുന്നത്. വസ്തുതകള്‍ പുറത്തുവരുന്നതിലുള്ള ജാള്യതയില്‍ ഉണ്ടായിട്ടുള്ള ഭയമാണ് മുഖ്യമന്ത്രിയെ പ്രതിപക്ഷത്തിനും മാധ്യമങ്ങള്‍ക്കും നേരെ കുതിരകയറാന്‍ പ്രേരിപ്പിക്കുന്നത്.അമേരിക്കയില്‍ ട്രംപും ഡല്‍ഹിയില്‍ മോദിയും ചെയ്യുന്ന കാര്യം പിണറായി തിരുവനന്തപുരത്തിരുന്ന് ചെയ്യുന്നു. ഏത് മാധ്യമങ്ങളാണ് ഉപചാപം നടത്തിയതെന്ന് മുഖ്യമന്ത്രി വ്യക്തമാക്കണം. കോടിയേരിയുടെ വിഡ്ഢിത്തത്തിന് മറുപടി പറയുമ്പോള്‍ അതെങ്ങനെയാണ് മുഖ്യമന്ത്രിയെ ചാരുന്നത്. താന്‍ ഉന്നയിക്കുന്ന ചോദ്യങ്ങള്‍ക്ക് മറുപടിതരാതെ എന്തൊക്കെയോ പറഞ്ഞ് പരിഹാസ്യനാകാനാണ് മുഖ്യമന്ത്രി ശ്രമിക്കുന്നത്. ട്രഷറി തട്ടിപ്പിനെ സംബന്ധിച്ച് മുഖ്യമന്ത്രി ഒന്നും പറയുന്നില്ല. ഇതില്‍ ഒന്നാംപ്രതി ധനമന്ത്രി തന്നെയാണ്. സ്വന്തംവകുപ്പില്‍ നടന്ന ഗുരുതരമായ ഈ തട്ടിപ്പില്‍നിന്ന് അദ്ദേഹത്തിന് തലയൂരാന്‍ കഴിയില്ല. നിരവധി ട്രഷറികളില്‍ ഇത്തരത്തില്‍ തട്ടിപ്പ് നടന്നുവെന്നാണ് വാര്‍ത്തകള്‍ പുറത്തുവരുന്നത്. കുറ്റമറ്റ നിലയില്‍ ട്രഷറിയെ നിയന്ത്രിക്കേണ്ടത് ധനമന്ത്രിയാണ്. വിജിലന്‍സ് അന്വേഷണം ആവശ്യപ്പെട്ടിട്ടുണ്ടെന്നും ചെന്നിത്തല പറഞ്ഞു.