മാവൂര്‍: കോഴിക്കോട്-മാവൂര്‍ റൂട്ടില്‍ ചെറൂപ്പ മിനിസ്റ്റേഡിയത്തിന് മുന്‍വശംവച്ച് ബൈക്ക് യാത്രക്കാരിയുടെ ബാഗ് പിടിച്ചുപറിച്ച് മോഷ്ടാക്കള്‍ കടന്നു കളഞ്ഞു. അരീക്കോട് കീഴുപറമ്പ് സ്വദേശി യാസിറിന്റെകൂടെ യാത്രചെയ്ത ഭാര്യ നജ്മുന്നീസയുടെ ബാഗാണ് ഓടിക്കൊണ്ടിരിക്കുന്ന ബൈക്കിനെ പിന്തുടര്‍ന്ന് മറ്റൊരു ബൈക്കിലെത്തിയ അക്രമികള്‍ കവര്‍ന്നത്. പിടിച്ചുപറിയുടെ ആഘാതത്തില്‍ ഓടിക്കൊണ്ടിരിക്കുന്ന ബൈക്കില്‍നിന്ന് താഴെവീണ നജ്മുന്നീസ(35) നിസാര പരുക്കേറ്റു. കോഴിക്കോട്ടുനിന്ന് കീഴുപറമ്പിലേക്കുപോവുകയായിരുന്നു ദമ്പതികള്‍. ഇന്നലെ രാത്രി പത്തോടെയാണ് സംഭവം.  ലൈസന്‍സ്, ആധാര്‍കാര്‍ഡ്, തരിച്ചറിയല്‍ കാര്‍ഡ് തുടങ്ങിയ രേഖകളും പണവും ഫോണും അടങ്ങിയ ബാഗാണ് നഷ്ടപ്പെട്ടത്. വിവരമറിഞ്ഞെത്തിയ പൊലിസ് സംഭവം നടന്ന തൊട്ടടുത്ത കെട്ടിടത്തിലെ സിസിടിവി കാമറ പരിശോധിച്ചു. അക്രമികള്‍ വന്ന ബൈക്കിനെ കുറിച്ച് വിവരം ലഭിച്ചതായറിയുന്നു. ഇന്ന് കൂടുതല്‍ തെളിവെടുപ്പ് നടത്തുമെന്ന് മാവൂര്‍ പൊലിസ് അറിയിച്ചു.