ബൈറൂത്ത്: സര്‍ക്കാര്‍ വിരുദ്ധ പ്രക്ഷോഭം ശക്തമാവുകയും നിരവധി മന്ത്രിമാരും എം.പിമാരും രാജിവയ്ക്കുകയും ചെയ്തതോടെ ലബ്‌നാനിലെ ഹസന്‍ ദിയാബ് സര്‍ക്കാര്‍ രാജിവച്ചു. ലബ്‌നാനിലെ അഴിമതി രാജ്യത്തെക്കാളും വലുതായിട്ടുണ്ടെന്ന് ഹസന്‍ ദിയാബ് പറഞ്ഞു. പ്രസിഡന്റ് മിച്ചല്‍ ഔന്‍ രാജി സ്വീകരിച്ചിട്ടുണ്ട്.
2019ല്‍ അന്നത്തെ പ്രധാനമന്ത്രി സഅദ് അല്‍ ഹരീരി കടുത്ത ജനകീയ പ്രക്ഷോഭത്തെ തുടര്‍ന്ന് രാജിവച്ച ശേഷമാണ് ഹസന്‍ ദിയാബ് അധികാരത്തിലേറുന്നത്. കടുത്ത സാമ്പത്തിക പ്രതിസന്ധിയും തൊഴിലില്ലായ്മയും മൂലം രാജ്യത്ത് സര്‍ക്കാര്‍ വിരുദ്ധ പ്രതിഷേധം ശക്തമാണ്. ഇതിനിടെയാണ് ഈമാസം നാലിന് ലബ്‌നാന്‍ തലസ്ഥാനമായ ബൈറൂത്തിലെ തുറമുഖത്ത് സ്‌ഫോടനമുണ്ടായത്. സ്‌ഫോടനത്തില്‍ 200ലധികം പേര്‍ കൊല്ലപ്പെടുകയും 6,000ത്തിലധികം പേര്‍ക്ക് പരുക്കേല്‍ക്കുകയും നഗരത്തിന്റെ വലിയൊരു ഭാഗം തന്നെ നശിപ്പിക്കപ്പെടുകയും ചെയ്തു. മൂന്നു ലക്ഷത്തോളം പേര്‍ ഭവനരഹിതരാവുകയും നിരവധിപേര്‍ക്ക് ജീവിതമാര്‍ഗം ഇല്ലാതാവുകയും ചെയ്തു.