തലശ്ശേരി: വടകര ലോക്‌സഭാ മണ്ഡലം യു.ഡി.എഫ് സ്ഥാനാര്‍ഥി കെ. മുരളീധരന്റെ തീരദേശ പര്യടനം തുടങ്ങി. തലശ്ശേരി മത്സ്യമാര്‍ക്കറ്റില്‍ തൊഴിലാളികളോട് വോട്ടഭ്യര്‍ഥിച്ചാണ് ഇന്നലെ രാവിലെ തുടക്കം കുറിച്ചത്.  സ്ഥാനാര്‍ഥിയെ വരവേല്‍ക്കാന്‍ നിരവധി തൊഴിലാളികള്‍ മാര്‍ക്കറ്റില്‍ തടിച്ചുകൂടിയിരുന്നു. ഇറച്ചിമാര്‍ക്കറ്റില്‍ നിന്നു മുദ്രാവാക്യം വിളിച്ചാണു മുരളീധരനെ തൊഴിലാളികള്‍ സ്വീകരിച്ചത്. കഴിഞ്ഞ വെള്ളപ്പൊക്കത്തെ സര്‍ക്കാര്‍ മഹാപ്രളയമാക്കിയപ്പോള്‍ കുടുംബങ്ങളെ രക്ഷിക്കാന്‍ ജീവന്‍ പണയംവച്ച് രംഗത്തിറങ്ങിയതു മത്സ്യത്തൊഴിലാളികളാണെന്നു മുരളീധരന്‍ പറഞ്ഞു.  തീരദേശയാത്രയില്‍ നിരവധി മത്സ്യത്തൊഴിലാളികള്‍ സ്ഥാനാര്‍ഥിയെ അനുഗമിച്ചു. എന്‍. മഹമൂദ്, പി.വി സൈനുദ്ദീന്‍, വി. രാധാകൃഷ്ണന്‍, സി.ടി സജിത്ത് തുടങ്ങിയ നേതാക്കള്‍ മുരളീധരനോടൊപ്പം ഉണ്ടായിരുന്നു.