തൊടുപുഴ : പഴനി ശബരിമല റോഡ് ദേശിയ പാതയാക്കിയെന്നും 2150 കോടി രൂപ അനുവദിച്ചുവെന്നും വ്യാജ പ്രചാരണം നടത്തി ജനങ്ങളെ കബളിപ്പിച്ച എല്‍.ഡി.ഫ് സ്ഥാനാര്‍ഥി ജോയ്‌സ് ജോര്‍ജ് പരസ്യമായി മാപ്പു പറയണമെന്ന് കേരള കോണ്‍ഗ്രസ് (എം ) ഇടുക്കി ജില്ലാ പ്രസിഡന്റ് പ്രൊഫ എം. ജെ. ജേക്കബ് വാര്‍ത്താ സമ്മേളനത്തില്‍ ആവശ്യപ്പെട്ടു .
ഇങ്ങനെയൊരു ദേശീയപാത വിജ്ഞാപനം ചെയ്തിട്ടില്ലെന്നും വിശദമായ പ്രൊജക്ട് റിപ്പോര്‍ട്ടും എസ്റ്റിമേറ്റും തയാറാക്കുകയോ ഒരു രൂപയെങ്കിലും നിര്‍മാണത്തിന് അനുവദിക്കുകയോ ചെയ്തിട്ടില്ലെന്ന് കാണിക്കുന്ന വിവരാവകാശ രേഖ അദ്ദേഹം വാര്‍ത്താ സമ്മേളനത്തില്‍ പ്രസിദ്ധപ്പെടുത്തി. എം.പിയുടെ വികസനനേട്ടമായി ഫ്‌ളക്‌സ് ബോര്‍ഡുകളിലും പ്രസ്താവനകളും കാണിച്ചിരിക്കുന്ന പദ്ധതികളില്‍ ഏറ്റവും പ്രധാന പദ്ധതിയാണ് ഇനിയും ഫണ്ട് അനുവദിക്കാത്ത ഈ റോഡ് .ഇതുപോലെ തന്നെയാണ് ശബരി റെയില്‍വേയും . കഴിഞ്ഞ അഞ്ചുവര്ഷക്കാലത്തു ഒരു കേന്ദ്ര സര്‍ക്കാര്‍ സ്ഥാപനമോ തൊഴില്‍ വിദ്യാഭ്യാസ സംരംഭങ്ങളോ നേടിയെടുക്കാന്‍ കഴിയാത്ത എം.പി പ്രചരിപ്പിക്കുന്ന വികസന നേട്ടങ്ങള്‍ ജനങ്ങളുടെ കണ്ണില്‍ പൊടിയിടാനുള്ളതാണ്.
കാര്‍ഷികമേഖലയ്ക്ക് ഒരു പദ്ധതി പോലും കേന്ദ്രത്തില്‍ നിന്ന് നേടിയെടുക്കാന്‍ കഴിഞ്ഞിട്ടില്ല .ഇടുക്കി ജില്ലയുടെ കാലാവസ്ഥ പ്രയോജനപ്പെടുത്തി ജില്ലയില്‍ ഒരു ടൂറിസം പദ്ധതി കൊണ്ടുവരാന്‍ കഴിഞ്ഞിട്ടില്ല . എം.പി അവകാശപ്പെടുന്ന ഏക ടൂറിസം പദ്ധതിയായ വാഗമണ്‍ പദ്ധതി കഴിഞ്ഞ യു.ഡി.ഫ് സര്‍ക്കാരിന്റെ കാലത്തു ആരംഭിച്ചതാണ്. ക്രിസ്തീയ സഭകളുടെ സ്ഥാപനങ്ങള്‍ക്ക് സര്‍ക്കാര്‍ നിയന്ത്രണം കൊണ്ടുവരാനുദ്ദേശിച്ചു കൊണ്ടുവന്ന ചര്‍ച്ച് ബില്ലിനെതിരെയുള്ള പ്രതിഷേധം തെരഞ്ഞെടുപ്പില്‍ പ്രതിഭലിക്കുമെന്നു അദ്ദേഹം പറഞ്ഞു . മനോഹര്‍ നടുവിലേടത് , ഫിലിപ്പ് ചേരിയില്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു .