പനാജി: ഐ.ഐ.ടിക്കായി നിര്‍ദേശിച്ചിരുന്ന 10 ലക്ഷം സ്‌ക്വയര്‍ മീറ്ററില്‍ 45,000 സ്‌ക്വയര്‍ മീറ്റര്‍ ക്ഷേത്രത്തിനായി വിട്ടുകൊടുത്ത് ഗോവ മന്ത്രിസഭ. ഐ.ഐ.ടി ക്യംാപസ് പണിയുന്നതിനെതിരെ രംഗത്തുവന്ന ഗുലേലി ഗ്രാമവാസികളെ തൃപ്തിപ്പെടുത്താനാണ് തീരുമാനം.

നിലവില്‍ ഗോവ എന്‍ജിനിയറിങ് കോളജിന്റെ സ്ഥലത്താണ് ഐ.ഐ.ടി പ്രവര്‍ത്തിക്കുന്നത്. സ്വന്തം കെട്ടിടത്തിനായി ഗുലേലിയില്‍ സ്ഥലം അനുവദിച്ച് സര്‍ക്കാര്‍ പ്രഖ്യാപിക്കുകയായിരുന്നു. എന്നാല്‍ നാട്ടുകാര്‍ പ്രതിഷേധവുമായി രംഗത്തെത്തിയെന്നാണ് വാദം.

കഴിഞ്ഞ ഏഴു വര്‍ഷമായി ക്യാംപസിന് സ്ഥലം കണ്ടെത്താനാവാത്ത അവസ്ഥയിലായിരുന്നു സര്‍ക്കാര്‍. മുന്‍പ് കനാകോണ, സാന്‍ഗ്വം തുടങ്ങിയ രണ്ട് ഗ്രാമങ്ങളില്‍ ക്യാംപസിനായി സ്ഥലം നിര്‍ദേശിച്ചെങ്കിലും എതിര്‍പ്പുമൂലം നടന്നില്ല.

'ഗ്രാമവാസികളുടെ താല്‍പര്യാനുസരണമാണ് സ്ഥലം മതകാര്യത്തിനായി മാറ്റിവച്ചത്'- ഗോവ മുഖ്യമന്ത്രി പ്രമോദ് സാവന്ത് പറഞ്ഞു.