മാനന്തവാടി: വര്‍ഷങ്ങളായുള്ള പൊതുജനങ്ങളുടെ ആവശ്യത്തിന് പരിഹാരമായി അപകടാവസ്ഥയിലുള്ള മരത്തിന്റ ശിഖരങ്ങള്‍ നഗരസഭയുടെ നേതൃത്വത്തില്‍ മുറിച്ച് മാറ്റി.
മാനന്തവാടി തലശ്ശേരി റോഡില്‍ കെ. എസ്.ആര്‍.ടി.സി ബൈപ്പാസ് ജങ്ഷനിലെ വാകമരത്തിന്റെ റോഡിലേക്ക് പടര്‍ന്ന് കിടക്കുന്ന ചില്ലകളാണ് മുറിച്ച് മാറ്റിയത്. നിരവധി ആളുകള്‍ കാല്‍നടയാത്ര ചെയ്യുന്നതും ബസ് കാത്തിരിപ്പ് കേന്ദ്രവും വ്യാപാര സ്ഥാപനങ്ങളും ജീപ്പ് സ്റ്റാന്റുമെല്ലാം ഉള്ള ജങ്ഷനിലെ മരത്തിന്റെ ശിഖരങ്ങള്‍ മുറിച്ച് മാറ്റണമെന്ന് നിരവധി തവണയായി ആവശ്യമുയര്‍ന്നിരുന്നു.
സബ്കലക്ടറും അപകട ഭീഷണിയുള്ള മരത്തിന്റ ശിഖരങ്ങള്‍ മുറിച്ച് മാറ്റണമെന്ന് ഉത്തരവ് നല്‍കിയിരുന്നു. കാലവര്‍ഷത്തിന് മുന്നോടിയായാണ് അപകടസാധ്യത കണക്കിലെടുത്ത് നഗരസഭ ടെന്‍ഡര്‍ നല്‍കി മരത്തിന്റെ ശിഖരങ്ങള്‍ മുറിച്ച് മാറ്റിയത്.