അന്തിക്കാട്: ഓടുന്നതിനിടെ വൈദ്യുതത്തൂണും വഴിവിളക്കുകളും കേടുവരുത്തിയ ഇതര സംസ്ഥാന ലോറി പൊലിസ് പിടികൂടി.
കഴിഞ്ഞ ദിവസം കൊല്ലത്തേക്ക് സ്‌കൂട്ടറുകള്‍ കയറ്റി പോയിരുന്ന ലോറിയാണ് കണ്ടശാംകടവിലെ വൈദ്യുതത്തൂണും വഴിവിളക്കുകളും കേടുവരുത്തിയത്.
ഡ്രൈവര്‍ ഇത് അറിഞ്ഞിരുന്നില്ല. പൊലിസ് ലോറിയെ പിന്തുടര്‍ന്ന് ഡ്രൈവറെ വിവരം ധരിപ്പിക്കുകയും പിഴയടപ്പിക്കുകയും ചെയ്തു.
വാഹനത്തിന്റെ മുകള്‍ ഭാഗമാണ് വൈദ്യുതി വിളക്കുകളില്‍ ഉരഞ്ഞു കേടുപാടുണ്ടാക്കിയത്. ലോറിയിടിച്ചു തകര്‍ന്ന വൈദ്യുതത്തൂണ്‍ മാറ്റി പുതിയത് സ്ഥാപിക്കാത്തത് യാത്രക്കാര്‍ക്കു ഭീഷണിയാകുന്നുണ്ട്.  വൈദ്യുതത്തൂണ്‍ കയര്‍ ഉപയോഗിച്ച് സമീപത്തെ പറമ്പിലെ തെങ്ങിലേക്കു വലിച്ചുകെട്ടിയ നിലയിലാണ്.
തിരക്കേറിയതും എന്നാല്‍ ഇടുങ്ങിയതുമായ റോഡില്‍ നിന്നു തകര്‍ന്ന തൂണ്‍ ഉടന്‍ മാറ്റി സ്ഥാപിക്കണമെന്ന് നാട്ടുകാര്‍ ആവശ്യപ്പെട്ടു.