പാനൂര്‍: കടുത്ത വരള്‍ച്ചയെ തുടര്‍ന്നു രൂക്ഷമായ കുടിവെള്ളക്ഷാമം നേരിടുമ്പോള്‍ വീടുകളില്‍ വെള്ളമെത്തിച്ച് പഞ്ചായത്ത് അംഗത്തിന്റെ നേതൃത്വത്തില്‍ വേറിട്ട പ്രവര്‍ത്തനം. തൃപ്രങ്ങോട്ടൂര്‍ പഞ്ചായത്തിലെ മുണ്ടത്തോട് വാര്‍ഡ് മെമ്പര്‍ എ.പി ഇസ്മാഈലിന്റെ നേതൃത്വത്തിലാണു ഈ മാതൃകാപരമായ പ്രവര്‍ത്തനം. വാര്‍ഡിലെ സുമനസുകളുടെ സഹായത്തോടെയാണു കുടിവെള്ള വിതരണം. വാഹനം കയറാന്‍ കഴിയാത്ത വീട്ടുകാര്‍ക്കു സമീപത്തുവച്ച് കുടിവെള്ളം വിതരണം ചെയ്യും.
കാലവര്‍ഷം ആരംഭിക്കുന്നതുവരെ ഇതു തുടരുമെന്ന് എ.പി ഇസ്മാഈല്‍ പറഞ്ഞു. ആര്‍.കെ കുഞ്ഞമ്മദ് ഹാജി, കാര്യാടത്തില്‍ മഹമൂദ്, എ.സി നാസര്‍, വയലോല്‍ അഷ്‌റഫ്, മഹമൂദ് കുളത്തിങ്കര, ബിവിത്ത് മുണ്ടത്തോട്, കാര്യേരി മമ്മു ഹാജി, ബാലകൃഷ്ണന്‍ വാഴയില്‍, കെ. ദിനേശന്‍ നേതൃത്വം നല്‍കി.