തിരുവനന്തപുരം: സ്വര്‍ണക്കടത്ത് വന്‍തോതില്‍ വര്‍ധിച്ച സാഹചര്യത്തില്‍ പുതിയ നടപടികളുമായി സംസ്ഥാന സര്‍ക്കാര്‍. സ്വര്‍ണത്തിന് ഇ വേ ബില്‍ ഏര്‍പ്പെടുത്താനും പിടികൂടിയ കള്ളക്കടത്ത് സ്വര്‍ണം വിട്ടുകൊടുക്കേണ്ടെന്നും തീരുമാനിച്ചതായി മന്ത്രി തോമസ് ഐസക്ക് പറഞ്ഞു.
പിടികൂടിയ സ്വര്‍ണം നിലവില്‍ നികുതിയടച്ച് കൊണ്ടുപോകാം. ഇനി നികുതിയടച്ചാല്‍ സ്വര്‍ണം വിട്ടുകൊടുക്കില്ലെന്നു മാത്രമല്ല അത് പിടിച്ചെടുത്ത് സര്‍ക്കാരിന്റേതാക്കി മാറ്റുകയും ചെയ്തു. കേന്ദ്ര മാതൃകയില്‍ സ്വര്‍ണം പിടികൂടാനാവശ്യമായ വിവരം നല്‍കുന്നവര്‍ക്ക് പിടികൂടുന്ന സ്വര്‍ണത്തിന്റെ വിലയുടെ 20 ശതമാനം പാരിതോഷികമായി നല്‍കുകയും ചെയ്യും.
ഇന്നലെ ചേര്‍ന്ന ജി.എസ്.ടി കൗണ്‍സില്‍ യോഗത്തിലാണ് കേരളത്തില്‍ ഇ വേ ബില്‍ നടപ്പാക്കുന്നതിന് അനുമതി ലഭിച്ചത്. രാജ്യത്താകെ സ്വര്‍ണത്തിന് ഇ വേ ബില്‍ നടപ്പാക്കണമെന്ന ആവശ്യം കേരളം ഉന്നയിച്ചെങ്കിലും പല സംസ്ഥാനങ്ങളും എതിര്‍ത്തെന്ന് മന്ത്രി പറഞ്ഞു. ഈ സാഹചര്യത്തില്‍ കേരളത്തില്‍ മാത്രം ഇ വേ ബില്‍ ഏര്‍പ്പെടുത്താന്‍ അനുവദിക്കണമെന്ന ആവശ്യം മറ്റ് സംസ്ഥാനങ്ങള്‍ അംഗീകരിച്ചതോടെ അതിനുള്ള നടപടിക്രമങ്ങളിലേക്ക് കടക്കുകയാണ്. ചട്ടങ്ങള്‍ തയാറാക്കി അടുത്ത ജി.എസ്.ടി കൗണ്‍സില്‍ യോഗത്തില്‍ കേരളം അവതരിപ്പിക്കും. കള്ളക്കടത്ത് സ്വര്‍ണം പഴയ സ്വര്‍ണമെന്ന പേരില്‍ കേരളത്തില്‍ വില്‍ക്കുന്നുണ്ട്. ഈ സ്വര്‍ണത്തിന് വില്‍ക്കുന്നവര്‍ നികുതി നല്‍കേണ്ടതില്ല. വാങ്ങുന്നവര്‍ നികുതി നല്‍കണമെന്ന വ്യവസ്ഥ ഏര്‍പ്പെടുത്തുന്നതിനെക്കുറിച്ച് ആലോചിക്കുന്നതായും മന്ത്രി പറഞ്ഞു.