തിരുവനന്തപുരം: കോണ്‍ഗ്രസിനോട് തൃശൂര്‍ സീറ്റ് ആവശ്യപ്പെട്ടുവെന്ന കെ.പി.സി.സി അധ്യക്ഷന്‍ മുല്ലപ്പള്ളി രാമചന്ദ്രന്റെ ആരോപണം ശരിയല്ലെന്ന് ബി.ജെ.പി നേതാവ് ടോം വടക്കന്‍. സീറ്റ് ചോദിച്ചതിന് തെളിവ് ഹാജരാക്കാന്‍ മുല്ലപ്പള്ളി തയാറാകണമെന്നും ടോം വടക്കന്‍ വാര്‍ത്താസമ്മേളനത്തില്‍ പറഞ്ഞു. മുന്‍പ് തൃശൂരില്‍ മത്സരിക്കാന്‍ താന്‍ ആഗ്രഹം പ്രകടിപ്പിച്ചിരുന്നു. അന്നത്തെ പ്രതികൂല സാഹചര്യത്തോടെ ഇനി മത്സരിക്കാനില്ലെന്ന് തീരുമാനിച്ചതാണ്. മുല്ലപ്പള്ളിയെ ഈ ആവശ്യം പറഞ്ഞ് ഒരു തവണപോലും വിളിക്കുകയോ കാണുകയോ ചെയ്തിട്ടില്ല. ന്യൂനപക്ഷങ്ങളെ കോണ്‍ഗ്രസ് വോട്ട് ബാങ്കായി മാത്രമാണ് കണ്ടതെന്നും വടക്കന്‍ മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടിയായി പറഞ്ഞു.