ഇരിട്ടി: ബോംബുകള്‍ ഉള്‍പ്പെടെ വന്‍ ആയുധ ശേഖരം ഇരിട്ടി പൊലിസ് പിടികൂടി. ഏഴ് സ്റ്റീല്‍ ബോംബ്, നാല് വടിവാള്‍, രണ്ടു കത്തി, രണ്ടു മഴു എന്നിവയാണ് പിടികൂടിയത്. ഇരിട്ടിക്കടുത്ത്  കുന്നോത്ത് കേളന്‍ പീടികയില്‍ മലപ്പൊട്ടിലെ മണ്‍റോഡിലുള്ള മുഹമ്മദ് എന്നയാളുടെ ഉടമസ്ഥതയിലുള്ള റബര്‍ പുരയില്‍ സൂക്ഷിച്ച നിലയിലായിരുന്നു ഇവ. ഇന്‍സുലേഷന്‍ ടാപ്പ് ചുറ്റിയ സ്റ്റീല്‍ ബോംബുകള്‍ പ്ലാസ്റ്റിക് ബക്കറ്റില്‍ ചകിരിക്കുള്ളില്‍ പൊതിഞ്ഞു സൂക്ഷിച്ച നിലയിലായിരുന്നു. വടിവാളുകളും കത്തികളും മഴുവും പ്ലാസ്റ്റിക് ചാക്കില്‍ പൊതിഞ്ഞ് അവക്കുമുകളില്‍ കടലാസു ചുറ്റി ചാക്കില്‍ കെട്ടി വച്ച നിലയിലായിരുന്നു.
മൂന്നു മാസമായി റബര്‍തോട്ടത്തില്‍ തൊഴിലാളികളോ ഉടമസ്ഥരോ എത്താറുണ്ടണ്ടായിരുന്നില്ല. ഇന്നലെ ഇവിടെ എത്തിയ തൊഴിലാളികളും മറ്റും പുകപ്പുര വൃത്തിയാക്കുന്നതിനിടയിലാണ് ചാക്കില്‍ കെട്ടിയ നിലയില്‍ ആയുധങ്ങള്‍ കാണുന്നത്. ഇരിട്ടിപൊലിസ് സ്ഥലത്തെത്തി പരിശോധന നടത്തി ഇവ കസ്റ്റഡിയിലെടുത്തു. ആയുധങ്ങള്‍ക്ക് ഒന്നര മാസത്തോളം പഴക്കം കാണുമെന്ന് പൊലിസ് പറഞ്ഞു. വടിവാളുകള്‍ക്ക് രണ്ടടിയിലേറെ നീളം വരും. ബോംബുകള്‍ ഉഗ്ര സ്‌ഫോടന ശേഷിയുള്ളവയാണെന്ന് പൊലിസ് അറിയിച്ചു. പിടികൂടിയ ബോംബുകള്‍ ഇന്നു ബോംബ് സ്‌ക്വാഡ് കരിങ്കല്‍ ക്വാറിയില്‍ എത്തിച്ചു നിര്‍വീര്യമാക്കും.