അങ്കമാലി: ഇന്നസെന്റിനെതിരേ തെരഞ്ഞെടുപ്പ് കമ്മിഷനില്‍ പരാതി. മുന്‍ എം.പി കെ.പി ധനപാലന്‍ പ്രാദേശിക വികസന ഫണ്ട് പൂര്‍ണമായി ചെലവഴിച്ചില്ലെന്നും താന്‍ ബാലന്‍സ് വന്ന തുകയും എം.പി എന്ന നിലയില്‍ തനിക്ക് കിട്ടിയ തുക ഉള്‍പ്പെടെ എല്ലാം ചെലവഴിച്ചു എന്നുമുള്ള പ്രചാരണത്തിനെതിരേയാണ് പരാതി. ഹൈക്കോടതി അഭിഭാഷകനും കെ.എസ്.യു മുന്‍ ജില്ലാ വൈസ് പ്രസിഡന്റും കെ.പി.സി.സി വിചാര്‍ വിഭാഗ് ജില്ലാ വൈസ് ചെയര്‍മാനുമായ അവനീഷ് കോയിക്കരയാണ് പരാതി നല്‍കിയിരിക്കുന്നത്.

വോട്ടര്‍മാരെ കബളിപ്പിക്കുന്നത് നിര്‍ത്തണമെന്നും യാഥാര്‍ഥ്യം നവ മാധ്യമങ്ങളിലൂടെയും പ്രമുഖ ദൃശ്യ മാധ്യമങ്ങളിലൂടെയും പ്രചരിപ്പിക്കാന്‍ നിര്‍ദേശിക്കണമെന്ന് ആവശ്യപ്പെട്ടുമാണ് പരാതി.

എം.പി എന്ന നിലയില്‍ കെ.പി ധനപാലന്‍ പലിശയടക്കം ലഭ്യമായ 21.06 കോടിയും ചെലവഴിച്ചതായാണ് രേഖകളില്‍. എന്നാല്‍ ധനപാലന് 25 കോടിയാണ് പ്രാദേശിക വികസന ഫണ്ട് ലഭിച്ചതെന്നും ഇതില്‍ 21.06 കോടി മാത്രമാണ് ചെലവഴിച്ചതെന്നുമാണ് ഇന്നസെന്റ് പ്രചാരണം നടത്തുന്നത്. തെറ്റായ ആരോപണം ദുരുദ്ദേശ്യത്തോടെയാണ്.
പലിശയടക്കം ലഭിച്ച 27.98 കോടിയില്‍ 3.25 കോടി ഇന്നസെന്റ് ചെലവഴിച്ചിട്ടില്ലെന്ന് സര്‍ക്കാര്‍ വെബ്‌സൈറ്റിലുണ്ടെന്നിരിക്കേയാണ് എം.പി ഫണ്ട് പൂര്‍ണമായും ചെലവഴിച്ചെന്ന് അവകാശവാദം ഉന്നയിക്കുന്നതെന്നും അവനിഷ് കോയിക്കര വ്യക്തമാക്കി.