തിരുവനന്തപുരം: 'കസബ' സിനിമയില്‍ സ്ത്രീത്വത്തെ അവഹേളിക്കുന്ന രംഗവും സംഭാഷണവും ഉണ്ടെന്നു ചൂണ്ടിക്കാട്ടി സിനിമയുടെ സംവിധായകന്‍ നിധിന്‍ രഞ്ജി പണിക്കര്‍, നിര്‍മാതാവായ ആലീസ് ജോര്‍ജ്, നടന്‍ മമ്മൂട്ടി എന്നിവര്‍ക്ക് നോട്ടിസ് അയയ്ക്കാന്‍ കേരള വനിതാ കമ്മിഷന്‍ തീരുമാനിച്ചു.

സ്ത്രീകളെ മോശമായി ചിത്രീകരിക്കുന്ന രംഗങ്ങളും സംഭാഷണവും ഒഴിവാക്കാന്‍ പരിശോധനാവേളയില്‍ കൂടുതല്‍ ജാഗ്രത പുലര്‍ത്തണമെന്ന് ഫിലിം സര്‍ട്ടിഫിക്കേഷന്‍ ബോര്‍ഡിനു നിര്‍ദേശം നല്‍കും.

ഇത്തരം കാര്യങ്ങള്‍ ഒഴിവാക്കാന്‍ പ്രത്യേകശ്രദ്ധ പാലിക്കണമെന്ന് സിനിമാരംഗത്തെ പ്രധാന സംഘടനകളായ 'മാക്ട'യോടും 'അമ്മ'യോടും ആവശ്യപ്പെടാനും ഇന്നലെ ചേര്‍ന്ന വനിതാ കമ്മിഷന്‍ യോഗം തീരുമാനിച്ചു.