കോഴിക്കോട്: ദേശീയതലത്തില്‍ ബി.ജെ.പിക്കെതിരേ ജനാധിപത്യ കൂട്ടായ്മ രൂപീകരിക്കുകയാണ് ലക്ഷ്യമെന്ന് സി.പി.ഐ നേതാവ് ബിനോയ് വിശ്വം.
ബി.ജെ.പിയുടെ ഫാസിസ്റ്റ് സര്‍വാധിപത്യത്തെ തടയാന്‍ കഴിയുന്ന കൂട്ടായ്മയാണ് ലക്ഷ്യമെങ്കിലും കോണ്‍ഗ്രസുമായി സഖ്യമുണ്ടാക്കാന്‍ ഉദ്ദേശമില്ല. ഇക്കാര്യം സി.പി.എം മനസിലാക്കുമെന്നാണ് പ്രതീക്ഷിക്കുന്നതെന്നും അദ്ദേഹം കോഴിക്കോട് മാധ്യമ പ്രവര്‍ത്തകരോടു പറഞ്ഞു.
കോണ്‍ഗ്രസുമായി സി.പി.ഐ സഖ്യമുണ്ടാക്കാന്‍ ശ്രമിക്കുന്നെന്ന തരത്തില്‍ സി.പി.എം ഉള്‍പ്പെടെയുള്ള പാര്‍ട്ടികള്‍ ആരോപണം ഉന്നയിച്ച സാഹചര്യത്തിലാണ് വിശദീകരണവുമായി ബിനോയ് വിശ്വം രംഗത്തെത്തിയത്.
ദേശീയ മതേതര, ജനാധിപത്യ വേദിയുടെ പേരില്‍ കോണ്‍ഗ്രസുമായി കൂട്ടുചേരാന്‍ സി.പി.ഐ ശ്രമിക്കുന്നുവെന്ന് സി.പി.എം സംസ്ഥാന സമിതിയില്‍ കഴിഞ്ഞ ദിവസം വിമര്‍ശനമുയര്‍ന്നിരുന്നു. ഇതിനെതിരെ സി.പി.ഐ സംസ്ഥാന സെക്രട്ടറി കാനം രാജേന്ദ്രനും രംഗത്തുവന്നിരുന്നു.