പയ്യന്നൂര്‍: ക്ഷേത്രത്തില്‍ അടിച്ചുതളിക്കുന്നതിനായി മകളെ സഹായിക്കാനെത്തിയ വൃദ്ധയുടെ മാല ബൈക്കിലെത്തിയ സംഘം കവര്‍ന്നു. ഇന്നലെ പുലര്‍ച്ചെ അഞ്ചോടെയായിരുന്നു സംഭവം. കോളോത്ത് സ്വദേശിനി പടപ്പില്‍ കമലാക്ഷി(68)യുടെ ഒന്നര പവന്റെ മാലയാണ് കവര്‍ന്നത്. ഇവരുടെ മകള്‍ പയ്യന്നൂര്‍ സുബ്രഹ്മണ്യ സ്വാമി ക്ഷേത്രത്തില്‍ അടിച്ചുതളിക്കാരിയാണ്. ക്ഷേത്രനടയില്‍ കുളക്കടവിന് സമീപം വൃത്തിയാക്കുന്നതിനിടെ ഇവരുടെ സമീപത്തേക്ക് വന്ന യുവാവ് ഒരാളെ അറിയുമോയെന്ന് അന്വേഷിച്ച ശേഷം മാല പൊട്ടിച്ച് ബൈക്കില്‍ രക്ഷപ്പെടുകയായിരുന്നു. ഇവര്‍ ബഹളം വച്ചെങ്കിലും ശക്തമായ മഴയും ക്ഷേത്രത്തില്‍ ആള്‍ക്കാര്‍ കുറവായതിനാലും സംഭവം ആരുമറിഞ്ഞില്ല. പയ്യന്നൂര്‍ പൊലിസ് കേസെടുത്ത് അന്വേഷണം ആരംഭിച്ചു.