തലശ്ശേരി: ന്യൂമാഹി പെരിങ്ങാടി മമ്മിമുക്ക് ജുമുആ മസ്ജിദിലെ കബറിടത്തില്‍ സിദ്ദിഖിനെ കൊന്നു കുഴിച്ചു മൂടിയ കേസിലെ പ്രതി കൂത്തുപറമ്പ് കോട്ടയംപൊയിലിലെ യൂസഫിനെ കൂടുതല്‍ ചോദ്യം ചെയ്യാന്‍ പൊലിസ് കസ്റ്റഡിയില്‍ വാങ്ങും. ഇതിനുള്ള അപേക്ഷ അടുത്ത ദിവസം കോടതിയില്‍ നല്‍കും. സിദ്ദിഖിനെ കാണാതായ ദിവസം ഇയാളുടെ കൈയില്‍ കുടയുണ്ടായിരുന്നു. ഇത് സമീപത്തെ പ്ലാസ്റ്റിക് കമ്പനിയിലെ സി.സി ടി.വി ദൃശ്യങ്ങളില്‍ കണ്ടെത്തിയിരുന്നു. എന്നാല്‍ പ്രതിയുമായി പള്ളി കബര്‍സ്ഥാനില്‍ തെളിവെടുപ്പ് നടത്തിയ വേളയില്‍ ഈ കുട കണ്ടെത്താന്‍ കഴിഞ്ഞിരുന്നില്ല. ആറര ഏക്കറളോളം വരുന്ന പള്ളി കബര്‍സ്ഥാനിലെ കാടുകള്‍ വെട്ടിത്തെളിച്ചു പരിശോധിച്ചിട്ടും കുട കണ്ടെടുക്കാന്‍ സാധിച്ചിരുന്നില്ല. കൊല്ലപ്പെട്ട സിദ്ദിഖിന്റെ ചെരുപ്പും ശവം കുഴിച്ചിടാന്‍ ഉപയോഗിച്ച തൂമ്പയും  പൊലിസ് കബര്‍സ്ഥാനില്‍ നിന്നു കണ്ടെടുത്തിരുന്നു. പ്രതിയുടെ മൊഴികളിലെ വൈരുധ്യങ്ങളും മറ്റും പരിശോധിക്കാന്‍ കൂടുതല്‍ ചോദ്യം ചെയ്യല്‍ ആവശ്യമാണെന്ന് അന്വേഷണ സംഘം കരുതുന്നു.