ന്യൂഡല്‍ഹി: റിയോ ഒളിംപിക്‌സില്‍ അത്‌ലറ്റിക്‌സില്‍ മെഡല്‍ നേടുക എന്നത് ഇന്ത്യന്‍ ടീമിനു ദുഷ്‌കരമായിരിക്കുമെന്ന് ഒളിംപ്യന്‍ അഞ്ജു ബോബി ജോര്‍ജ്. മികച്ച സംഘമാണ് റിയോയില്‍ മത്സരിക്കുന്നത്. അതില്‍ പലര്‍ക്കും ഫൈനലിലെത്താന്‍ സാധിക്കുമെന്നാണ് പ്രതീക്ഷിക്കുന്നത്. എന്നാല്‍ മെഡല്‍ നേടുക ദുഷ്‌കരമായിരിക്കുമെന്നു അഞ്ജു പറഞ്ഞു. എന്നാല്‍ 2024 ഒളിംപിക്‌സാവുമ്പോഴേക്ക് ഇന്ത്യക്ക് മെഡല്‍ നേടാന്‍ സാധിക്കുമെന്നും അഞ്ജു കൂട്ടിച്ചേര്‍ത്തു.

100 മീറ്ററില്‍ ദ്യുതി ചന്ദ് വളരെ പ്രതീക്ഷയുണര്‍ത്തുന്ന താരമാണ്. 36 വര്‍ഷത്തിനു ശേഷമാണ് വനിതാ വിഭാഗത്തില്‍ ഒരു താരം 100 മീറ്ററിന് യോഗ്യത നേടുന്നത്. പുരുഷ വിഭാഗം റിലേ ടീമും മികച്ച ഫോമിലാണ്. പ്രകടനത്തില്‍ അവര്‍ അമേരിക്കയ്ക്ക് മാത്രം പിന്നിലാണ്. ഇതേ പ്രകടനം റിയോയില്‍ ആവര്‍ത്തിച്ചാല്‍ അവര്‍ക്ക്് ഫൈനലിലെത്താന്‍ സാധിക്കുമെന്നും അഞ്ജു പറഞ്ഞു.