ചാവക്കാട്: അലങ്കാര വളര്‍ത്തു മൃഗങ്ങളുടെ കച്ചവടത്തിന്റെ മറവില്‍ കഞ്ചാവു വില്‍പ്പന നടത്തിയ യുവാവ് അറസ്റ്റില്‍. മുല്ലത്തറയില്‍ അലങ്കാര വളര്‍ത്തു മൃഗങ്ങളുടെ കച്ചവടം നടത്തുന്ന കോഴിക്കോട് നല്ലളം മോഡേണ്‍ ബസാറില്‍ മമ്മത്ത് വീട്ടില്‍ മുഹമ്മദ് അല്‍ത്താഫിനെയാണ് (18) ചാവക്കാട് പൊലിസ് അറസ്റ്റ് ചെയ്തത്. ഇയാളില്‍ നിന്ന് 110 ഗ്രാം കഞ്ചാവ് പിടിച്ചെടുത്തു.
ചാവക്കാട് സി.ഐ സജീവിന് ലഭിച്ച രഹസ്യ വിവരത്തെ തുടര്‍ന്ന് നടത്തിയ അന്വേഷണത്തിലാണ് ഇയാള്‍ പിടിയിലായത്. പ്രദേശത്തെ വിവിധ സ്‌കൂളുകള്‍, കോളജ് വിദ്യാര്‍ഥികള്‍ക്കാണ് ഇയാള്‍ കഞ്ചാവ് വില്‍പ്പന നടത്തിയിരുന്നത്.